Microsoft amerıkalyq Tik Tok áleýmettik jelisiniń segmentin satyp alýǵa daıyn

NЬıÝ IORK.QazAqparat – Microsoft kompanııasy AQSh prezıdenti Donald Tramp elde tanymal qosymshany paıdalanýǵa tyıym salamyn dep qorqytqannan keıin birneshe kún ótken soń, TikTok áleýmettik jelisiniń amerıkalyq segmentin satyp alý týraly kelissózderdi jalǵastyrýǵa daıyn ekenin málimdedi, dep habarlaıdy QazAqparat CNN agenttigine silteme jasap.

Jeksenbi kúni Microsoft kompanııasy ózderiniń bas dırektory Satıa Nadellanyń AQSh prezıdenti Tramppen qazirgi ýaqytta qytaılyq ByteDance ıelik etetin qosymshany satyp alý jaıly talqylaǵanyn habarlady.

AQSh-tyń saıası toptary birneshe apta boıy AQSh pen Qytaı arasyndaǵy shıelenistiń ýshyǵýyna baılanysty bul qosymshaǵa alańdaýshylyq bildirdi. Kóptegen adamdar atalǵan qosymsha ulttyq qaýipsizdikke qaýip tóndirýi múmkin dep sanaıdy.

Óz málimdemesinde bul qosymsha tolyq qaýipsizdik saraptamasynan ótken jaǵdaıda Microsoft kompanııasy TikTok qosymshasyn satyp alýǵa daıyn ekenin rastady. Sondaı-aq kelissózder barysynda Microsoft AQSh úkimetimen, onyń ishinde Prezıdentpen dıalogty jalǵastyrýǵa nıetti ekeni málimdemede aıtylǵan.

Microsoft «kez-kelgen jaǵdaıǵa» qaramastan, ByteDance-pen kelissózderdi 15 qyrkúıekten keshiktirmeı aıaqtaıtynyn aıtty.

Sońǵy málimdemesinde TıkTok servısiniń ókilderi qosymshanyń uzaq merzimdi tabysty bolatynyna senimdi ekenin, paıdalanýshylar sany 1 mıllıardtan asatynyn atap ótti. Kompanııa qazirdiń ózinde AQSh-ta shamamen 1000 adamdy jaldaıdy. Búkil el boıynsha taǵy 10 000 jumys ornyn qurýdy josparlap otyr. Servıstiń Nıý-Iork, Los-Andjeles, London, Parıj, Berlın, Seýl, Tokıo jáne álemniń basqa da qalalarynda ókildikteri bar.