Microsoft álemdegi eń baı qoǵamdyq kompanııaǵa aınaldy

Microsoft korporatsııasy baılyǵy jóninen jarııa kompanııalar arasynda Apple-di basyp ozyp, álemde birinshi orynǵa shyqty, dep habarlaıdy Kazinform Trend.az-ǵa silteme jasap. 

Microsoft-tyń kapıtaldandyrýy 2,89 trıllıon dollarǵa jetip, Apple-diń 2,87 trıllıon dollarynan asyp tústi. 12 qańtarda Microsoft aktsııalary 1%-ǵa qymbattap, 388,47 dollardy qurady, Apple aktsııalary 0,2%-ǵa qymbattady. Bul 2021 jyldyń qarashasynan beri Microsoft korporatsııasynyń Apple-di qundylyǵy boıynsha birinshi ret basyp ozýy. 

Sarapshylar Microsoft-tyń qarjylyq jetistigi jasandy ıntellekt (AI) strategııasynyń aıqynyraq bolýymen baılanysty ekenin aıtty. 

Apple aktsııalary 2023 jyldyń jeltoqsanynda iPhone 15 satylymynyń tómendeýine qatysty alańdaýshylyqqa baılanysty, sondaı-aq Qytaı bıliginiń Apple smartfondaryn memlekettik qyzmetkerlerge paıdalanýǵa tyıym salý týraly sheshimine baılanysty tómendeı bastady. Bul faktorlar Apple-diń 2024 jyldyń basynan beri naryqtyq kapıtaldandyrýdan shamamen 162 mıllıard dollar joǵaltýyna ákeldi.