Microsoft AQSh mektepterindegi jasandy ıntellekt júıelerine jańa shekteýler engizedi
ASTANA. KAZINFORM- Microsoft AQSh mektepterinde qoldanylatyn jasandy ıntellekt júıelerine arnalǵan jańa shekteýler men qupııalylyq standarttaryn engizedi, dep habarlaıdy Euronews.
Jańa erejeler eldegi ekinshi iri muǵalimder kásipodaǵymen kelisildi.
Kelisimge sáıkes, oqýshylardyń jasandy ıntellekt júıelerimen emotsıonaldyq baılanys ornatýyna nemese olarǵa táýeldi bolýyna yqpal etetin seriktes-bottar men fýnktsııalardy paıdalanýǵa tyıym salynady. Sondaı-aq oqýshylardyń oqý tapsyrmasyn oryndaýǵa qajetti ýaqyttan uzaq ýaqyt boıy nazaryn ustap turatyn fýnktsııalarǵa shekteý qoıylady. Bul standarttar zańdy kúshke ıe jáne táýelsiz aýdıt júrgizýdi qarastyrady.
Microsoft oqýshylar men muǵalimderdiń derekterin ózderiniń jasandy ıntellekt júıelerin oqytý úshin paıdalanbaýǵa mindettendi. Buǵan oqýshylardy qorǵaý úshin qajet derekterdiń shekteýli jıyntyǵy ǵana kirmeıdi. Jınalǵan aqparatty satýǵa, jarnama maqsatynda paıdalanýǵa nemese jańa ónimder ázirleýge qoldanýǵa bolmaıdy.
Sonymen qatar kompanııa otbasylarǵa óziniń jasandy ıntellekt quraldarynyń qalaı jumys isteıtinin jáne qandaı derekterdi jınaıtynyn aıqyn túsindirýge tıis. Jańa standarttar 1 qarashadan bastap AQSh-taǵy Microsoft kompanııasynyń barlyq mekteptermen jasalǵan kelisimsharttaryna qoldanylady.
Amerıkalyq muǵalimder kásipodaǵymen osyndaı kelisimderdi OpenAI jáne Anthropic kompanııalary da talqylap jatyr. Eki kompanııa da bilim berý salasynda jasandy ıntellekt qaýipsizdigin kúsheıtý jáne derekterdi qorǵaý bastamalaryn qoldaıtynyn málimdedi.
Buǵan deıin Meta balalardyń qaýipsizdigine qatysty talaptardy retteý úshin $17 mlrd tóleýge keliskeni týraly jazdyq.
