Microsoft 60 myńǵa jýyq qyzmetkerine jumystan óz erkimen ketýdi usyndy
ASTANA. KAZINFORM — Amerıkalyq tehnologııalyq alpaýyt Microsoft álem boıynsha qyzmetkerlerine ótemaqy tólenetin erikti jumystan ketý baǵdarlamasyn usynady. Bul týraly dúısenbi kúni kompanııanyń kadr máselelerine jaýapty dırektory málimdedi, dep jazady Euronews.
Qyzmetkerlerge jiberilgen ishki hatta Emı Koýlman Voluntary Exit Offer baǵdarlamasyn kompanııadaǵy ózgeristerge degen kózqarasty jańartýdyń mańyzdy bóligi dep atady. Onyń aıtýynsha, bul bastama qyzmetkerlerge kóbirek erkindik berip, kásibı jolyn ári qaraı qalaı jalǵastyratynyn ózderi sheshýine múmkindik beredi.
Baǵdarlama AQSh, Kanada, Úndistan jáne Ulybrıtanııadaǵy keıbir bólimshelerdiń 70-deńgeıdegi jáne odan tómen deńgeıdegi qyzmetkerlerine qoljetimdi bolady. Olardyń arasynda keıbir basshylar da bar.
— Bul — belgili bir ýaqyt aralyǵynda ǵana qoljetimdi erikti baǵdarlama. Ol talaptarǵa saı keletin qyzmetkerlerge qarjylaı qoldaý alyp, mansabyn josparlaýǵa qajetti resýrstarmen qamtamasyz etilgen kúıde Microsoft kompanııasynan ketýge múmkindik beredi, — delingen hatta.
Baǵdarlamaǵa qatysýǵa quqyǵy bar qyzmetkerler aldaǵy saǵattarda elektrondyq poshtalaryna usynys siltemesi bar hat alady.
Jalpy, baǵdarlamaǵa 60 myńǵa jýyq adam qatysa alady.
Bıyl shildede Microsoft bıznes baǵytyn qaıta qaraý jáne shyǵyndardy azaıtý maqsatynda shamamen 4 800 jumys ornyn qysqartatynyn jarııalaǵan edi. Bul sol kezdegi kompanııanyń álemdik jumys kúshiniń shamamen 2,1 paıyzy bolatyn. Qysqartý negizinen kommertsııalyq bólim men Xbox oıyn bıznesine áser etti. Kompanııa bul qadamdy jasandy ıntellektiniń róli artyp kele jatqan kezeńde qabyldady.
Bıyl Microsoft qyzmetkerleriniń bir bóligine zeınetke merziminen buryn shyǵý múmkindigin de usynǵan.
Kompanııanyń málimetinshe, merziminen buryn zeınetke shyǵý baǵdarlamasyna qatysýǵa quqyǵy bolǵan qyzmetkerlerdiń 30 paıyzdan astamy usynysty qabyldaǵan. Korporatsııa osyndaı tásilderdi aldaǵy ýaqytta da qarastyratynyn málimdedi.
Buǵan deıin Microsoft kompanııasy kúrdeli aýrýlardy dıagnostıkalaýǵa arnalǵan jasandy ıntellekt júıesin tanystyrdy. Synaq barysynda júıe medıtsınalyq kúrdeli jaǵdaılardy 83% dáldikpen anyqtaǵan.
