MIB tóraǵalary úsh jylǵa saılanady: 15 qyrkúıekten keıin ne ózgeredi

ASTANA. KAZINFORM — QR «Turǵyn úı qatynastary týraly» Zańyna engizilgen ózgeristerge sáıkes, 2025 jylǵy 15 qyrkúıekten keıin múlik ıeleri birlestiginiń tóraǵalary jalpy jınalysta úsh jyl merzimge saılanyp, úı keńesiniń quramynda bolady, dep habarlaıdy Astana qalasynyń ákimdigi.

— Tóraǵa jáne keńes quramyna úmitker retinde bekitilý úshin kandıdat páterdiń nemese turǵyn emes úı-jaıdyń menshik ıesi bolýy tıis. Sondaı-aq menshik ıesiniń otbasy músheleri (jubaıy), balalary, ata-anasy jáne menshik ıesimen turaqty turatyn tulǵalar da qaraýǵa jiberiledi. Múlik ıeleri birlestiginiń tóraǵasy múlik ıeleri birlestiginiń múddelerin barlyq sotta, memlekettik organdarda jáne ózge de uıymdarda senimhatsyz usynýǵa quqyly, — delingen habarlamada.

Sondaı-aq, jınalys nemese úı keńesiniń hattamalyq sheshimderi saqtalǵan jaǵdaıda, eger múlik ıeleri birlestiginiń tóraǵasy ýaqytsha eńbekke jaramsyzdyq nemese ózge de sebeptermen on bes kúntizbelik kúnnen astam ýaqyt boıy óz fýnktsııalaryn oryndaı almasa, úı keńesi múlik ıeleri birlestiginiń tóraǵasynyń mindetin ýaqytsha atqarýshyny keńes músheleriniń arasynan saılaıdy.

Alaıda bul merzim jańa múlik ıeleri birlestiginiń tóraǵasy saılanǵanǵa deıin alty aıdan aspaýy kerek. Sondaı-aq, tóraǵa kondomınıým nysanyn basqarý úshin kóppáterli turǵyn úıdiń basqarýshysy retinde eńbek shartyna otyrýǵa quqyly. Ol úshin oǵan basqarýshyny jaldaý ókilettigin berý týraly jınalystyń nemese úı keńesiniń sheshimi qajet.

Kóppáterli turǵyn úıdiń basqarýshysy Qazaqstan Respýblıkasynyń azamaty bolýy jáne onyń kásibı biliktiligin rastaıtyn qujaty bolýy tıis.

Eńbek sharty jasalyp, resimdelgennen keıin basqarýshy kondomınıým nysanyn basqarý sýbektileriniń jáne kóppáterli turǵyn úılerdiń basqarýshylar reestrine engizý úshin turǵyn úı ınspektsııasyna aqparat jiberedi.

Osylaısha, tóraǵa úı keńesiniń fýnktsııalarymen birge basqarý qyzmetinde qalsa, basqarýshy eńbek sharty negizinde nysan boıynsha negizgi qyzmetti júzege asyrady.

Buǵan deıin Astananyń eki aýdanynda elektr energııasyn berý ýaqytsha toqtatylatyny aıtyldy.