Mı isigin bassúıekti ashpaı-aq emdeý: qazaqstandyq dáriger ozyq ádisti meńgerdi
ASTANA. KAZINFORM — Mı isigin emdeý kezinde bassúıekti ashpaı-aq, isikti qanmen qamtamasyz etetin tamyrlardyń jumysyn toqtatýǵa bolady. Jas neırohırýrg Islambek Musabekov meńgergen bul ádis keıingi operatsııa kezindegi qan joǵaltýdy azaıtyp, naýqastyń saýyǵý múmkindigin arttyrady.
QR Prezıdenti Іs basqarmasy Medıtsınalyq ortalyǵynyń aýrýhanasynda mı aýrýlaryn emdeýdiń joǵary tehnologııalyq ádisteri klınıkalyq tájirıbege engizilip, damytylyp keledi. Osy baǵytta eńbek etip júrgen jas mamandardyń biri — neırohırýrg Islambek Musabekov. Ol mı isigi bar naýqastarǵa kórsetiletin medıtsınalyq kómektiń múmkindikterin keńeıtýge orasan úles qosyp júr.
Jas dáriger meńgergen ádisterdiń biri — embolızatsııa. Bul — isikti qanmen qamtamasyz etetin tamyrlardaǵy qan aǵymyn arnaıy materıaldardyń kómegimen toqtatý tásili. Ol úshin patsıenttiń san tusynan kishkentaı tilik jasalyp, jińishke kateter engiziledi. Kateter qan tamyrlary boıymen isikti qorektendiretin tamyrlarǵa deıin jetkizilip, olardyń sańylaýy arnaıy medıtsınalyq materıalmen biteledi.
— Embolızatsııa isiktiń qanmen qamtylýyn azaıtyp, keıin ony hırýrgııalyq jolmen alyp tastaý kezinde bolatyn qan joǵaltý kólemin tómendetýge múmkindik beredi. Bul emdeý kezeńinde bas súıegin ashyp operatsııa jasaý qajet emes. Keıin naýqastyń jaǵdaıy turaqty bolyp, asqynýlar baıqalmasa, ol tórt-bes táýlikte aýrýhanadan shyǵarylady, — deıdi maman.
Atalǵan medıtsınalyq kómek mindetti áleýmettik medıtsınalyq saqtandyrý (MÁMS) júıesi aıasynda kórsetiledi.
Islambek Musabekov klınıkalyq tájirıbemen qatar ǵylymı-zertteý jumystarymen de aınalysady. 2026 jyly halyqaralyq ǵylymı jýrnaldardyń birinshi kvartıline (Q1) jatatyn basylymdarda tórt ǵylymı maqala jaryq kórdi. Sonyń úsheýi mı qabyqtarynan damıtyn isik túri — menıngıomalardy zertteýge arnalǵan.
Jas neırohırýrg sheteldik áriptesterimen kásibı baılanys ornatyp, tájirıbe almasyp, neırohırýrgııadaǵy emdeý tásilderiniń jańa múmkindikterin zerdelep keledi. Dárigerdiń aıtýynsha, jasalǵan em-sharalardan keıin naýqastardyń basym bóligi kúndelikti tirshiligi men eńbek qyzmetine oralyp, ómir sapasyn saqtaı alady.
MOA-da neırohırýrgııanyń ozyq baǵyttaryn damytý — ǵylymı jetistikterdi klınıkalyq tájirıbege engizip, mı isigi bar naýqastarǵa kórsetiletin medıtsınalyq kómektiń aýqymy men sapasyn arttyrýǵa baǵyttalǵan júıeli jumystyń bir bóligi.
Osyǵan deıin PІB aýrýhanasynda kúrdeli operatsııalar úlken tiliksiz jasalatynyn jazǵanbyz.