Mı qyzmetin zertteýge arnalǵan zamanaýı ǵylymı ortalyq ashyldy
ASTANA.KAZINFORM — Ál-Farabı atyndaǵy Qazaq ulttyq ýnıversıtetinde Qazaqstan men Ortalyq Azııadaǵy alǵashqy mamandandyrylǵan ǵylymı-bilim berý ortalyǵy — Mı ınstıtýtynyń saltanatty ashylý rásimi ótti.
Aýqymdy shara Ulttyq ǵylym akademııasynyń 80 jyldyǵyna oraı uıymdastyrylyp, elimizdiń ǵylymı-tehnologııalyq áleýetin nyǵaıtý jolyndaǵy mańyzdy qadam boldy.
Іs-sharaǵa Ál-Farabı atyndaǵy QazUÝ basqarma tóraǵasy — Rektor Janseıit Túımebaev, Ulttyq ǵylym akademııasynyń prezıdenti Aqylbek Kúrishbaev, memlekettik organdardyń, ǵylymı uıymdardyń, medıtsınalyq ortalyqtardyń ókilderi, otandyq jáne sheteldik seriktester qatysty.
Instıtýt 2018 jyly qurylǵan QazUÝ-dyń Kognıtıvtik neıroǵylym ortalyǵy negizinde ashyldy. Bul mı qyzmetin zertteý men jańa býyn mamandaryn daıarlaý baǵytyndaǵy kópjyldyq jumystyń nátıjesi. Zertteýler álemdik deńgeıdegi zamanaýı qural-jabdyqtardyń kómegimen júrgiziledi. Olardyń qatarynda 3 Tesla magnıttik-rezonanstyq tomografy, ANT Neuro joǵary tyǵyzdyqtaǵy EEG júıeleri, fýnktsıonaldyq jaqyn ınfraqyzyl spektroskopııa (fNIRS) tehnologııalary, sondaı-aq jasandy ıntellekt pen úlken derekterdi taldaý ádisteri bar.
Saltanatty jıynda sóz sóılegen Janseıit Túımebaev Memleket basshysy Qasym-Jomart Toqaev ǵylymdy damytýǵa basymdyq berip otyrǵanyn atap ótti.
— Ǵylymı-tehnologııalyq áleýetti arttyrý, pánaralyq zertteýlerdi kúsheıtý jáne ınnovatsııalardy óndiriske engizý — ǵylymı-bilim berý qaýymdastyǵynyń basty mindetteri. Ál-Farabı atyndaǵy QazUÝ bul baǵyttaǵy bastamalardy árdaıym qoldap keledi. Mı ınstıtýtynyń ashylýy — memlekettik saıasattyń naqty nátıjesi, — dedi rektor.
Óz kezeginde QR UǴA prezıdenti Aqylbek Kúrishbaev jańa ınstıtýttyń otandyq ǵylym úshin mańyzy zor ekenin atap ótti. Onyń pikirinshe, ýnıversıtet pen Ǵylym akademııasy arasyndaǵy tabysty yntymaqtastyqtyń jarqyn úlgisi ári eldiń zııatkerlik áleýetin nyǵaıtýǵa baǵyttalǵan mańyzdy bastama.
Professor Álmıra Qustybaeva jetekshilik etetin ınstıtýt kognıtıvtik, minez-qulyqtyq, esepteý neıroǵylymy jáne neırolıngvıstıka zerthanalaryn biriktiredi. Instıtýt qyzmetiniń negizgi baǵyttary qatarynda mıdyń qalypty jáne patologııalyq damýyn zertteý, kognıtıvtik fýnktsııalardy taldaý, neırodegeneratıvti aýrýlardy zerdeleý, emotsııalar men sheshim qabyldaý tetikterin anyqtaý, kóptildiliktiń neırolıngvıstıkalyq erekshelikterin zertteý, sondaı-aq jańa dıagnostıkalyq jáne boljamdyq bıomarkerler ázirleý bar.
Aıta ketelik Alaqan Mektep: oqýshylardyń bıometrııalyq derekteri qalaı qorǵalatyny týraly jazǵan edik.
