Mı ımplanttary oılanýdyń bolashaǵy ma – The Guardian
NUR-SULTAN. QazAqparat - «Eki jyl buryn sal aýrýymen aýyratyn 66 jastaǵy Dennıs Degreı óz mıynan dosynyń telefonyna habarlama jibergen edi, sebebi onyń mıyna kishkentaı ımplanttar salynǵan bolatyn», dep jazady The Guardian.
Bul tarıhı oqıǵa bolǵanymen, mamandardyń aıtýynsha, ımplant mıǵa ornalastyrylǵandyqtan, keri reaktsııa da bolady ári ýaqyt óte kele sıgnaldar da álsireı beredi.
«Búkil álem boıynsha mundaı ımplant tek on adamǵa salynǵan. Al shilde aıynda Ilon Mask Neuralink kompanııasy qurastyryp jatqan ımplanttardy tanystyrǵan edi. Qazir bul ımplanttar maımyldarǵa qondyrylǵan, al 2020 jyldyń sońynda adamǵa salyna bastaıdy. Neuralink kompanııasyna 158 mıllıon dollar qarjy salynǵan», - delingen maqalada.
Degenmen, Ulybrıtanııanyń Patshalyq qaýymdastyǵy neıron ınterfeısiniń tehnologııalaryn qoldaný jáne retteýdiń júıesi qajet ekenin málimdedi.
«Mıdyń málimetteri kimge tıesili? Olar qandaı maqsatta qoldanylýy múmkin? Úshinshi tarap mıdy basqarý múmkindigine ıe bola ala ma? Implanttardy hakerler buza ala ma? Sonymen qatar etıkalyq máselelerdi de eskerý kerek. Tehnologııalar tıimdi bolsa, ony tek baılar ǵana qoldana ala ma? Buny da zertteý kerek», - deıdi qaýymdastyq mamandary.
Sarapshylardyń aıtýynsha, tehnıkalyq problemalar sheshilgenimen, áleýmettik faktorlar kedergi bolýy múmkin. ıAǵnı, etıkalyq, quqyqtyq jáne áleýmettik saldardy nazarǵa alý kerek.
