«Mezet nemese jáı ǵana ómir» atty jańa kórkem fılm jaryqqa shyqty (FOTO)
ASTANA. QazAqparat - Almatyda «Mezet ılı prosto jızn» atty jańa kórkem fılmniń tusaýkeseri ótti. Fılm 4 aqpannan bastap prokatqa shyǵady.
Qazaqstandyq tolyq metrajdy fılmniń rejısseri Aqjol Ábilovtiń aıtýynsha, kartınanyń ıdeıasy stsenarıst Ardaq Qaryqbolovamen birlesken avtorlyqta jasalǵan. Kınotaspany qurý tarıhy keleshek rejısser - Qazaq ulttyq óner ýnıversıteti stýdentiniń kýrstyq jumys úshin taqyryp izdeýinen órbigendikten, bastapqyda fılm qysqa metrajdy týyndy retinde oılastyrylǵan eken. Alaıda oqıǵa sońy sıýjettermen, keıipkerlermen tolyqtyryla kele, stsenarıı shynaıy ómir jaǵdaılaryna negizdelgen tolyqqandy fılmge aınalǵan.
Anyǵyraq toqtalsaq, mazmuny óte qarapaıym fılm óziniń shynaıylyǵymen ári naqtylyǵymen kórermendi baýrap almaq. Fılmniń basynda kórermenderge kartınanyń basty keıipkeri - Asqar esimdi boıdaq ári isker azamat tanystyrylady. Ol dostyqty baǵalamaıtyn, mahabbattyń ne ekendigin túsinbeıtin jáne aınaladaǵy adamdardy syılamaıtyn jigit. Kúnderdiń bir kúninde Asqar kenet esin joǵaltady. Odan keıin únemi aýrýhanada jatý, medıtsınalyq tekseristerden ótý ony tipten abyrjytyp jiberedi. Dárigerler oǵan ota da qaýqarsyz údemeli mı isigi dıagnozyn qoıady. Bir aı ǵana ómiri qalǵanyn estigen Asqar tereń kúızeliske túsedi...
Sóıtip, ishimdikke salynyp júrip, ol bir kúni taǵdyrdyń tálkegimen áldebir aýylǵa tap bolady. Mine, osy eldi mekende Asqar erekshe bir oqıǵaǵa kezigedi. Sonyń arqasynda Asqar múldem ózgeredi, qarym-qatynasty, ómirdi jáne mahabbatty baǵalaı bastaıdy. Fılmniń aqyry odan da qyzyqty, oǵan kórermender ózderi tamashalaǵanda kýá bolady. «Mezet ılı prosto jızn» fılminiń kórsetilimi 4 aqpanda bastalady dep kózdelýde.
Fılmdegi basty roldi tanymal otandyq akter - Nurjan Sadybekov oınaıdy. Sonymen qatar, fılmde basqa da kıno juldyzdary Nurjan Tutov, Gúlbahram Baıbosynova, Almat Saqatov, Erden Telemisov, Azat Seıtmetov kórermenderin qýantpaq.
