Meıvezer- Makgregor básekesi aqsha tabý úshin jasalǵan
ALMATY. QazAqparat - Qazaqstandyq sportshy, djıý-djıtser Albert Aldııarov bokstan 12 dúrkin Álem chempıony kishi Floıd Meıvezer men MMA nusqasy boıynsha UFC chempıony Konor Makgregor arasyndaǵy jekpe-jek týraly pikirin bildirdi. Sondaı-aq sportshy QazAqparat tilshisine djıý-djıtsý sportynda qandaı ádis-aılamen jeńýge bolatynyn aıtty.
Albert Aldııarov Azııa chempıonatynda 77 keli salmaq boıynsha nevaza-sıstem bóliminde qola medal ıelengen bolatyn.
Halyqaralyq dárejedegi sport sheberi, 2014 jylǵy Álem chempıonatynyń qola júldegeri, djıý-djıtsýdan ekinshi dan ıegeriniń aıtýynsha, eki túrli sport salasynyń arasyndaǵy jekpe-jekter tek aqsha tabý úshin uıymdastyrylady.
«Bul jaı ǵana shoý. UFC chempıony bola turyp men basqa sport erejeleri boıynsha judyryqtaspas edim. Bul jerde tek Floıdtyń atynyń arqasynda kóp aqsha tabý maqsaty ǵana aıqyn. Floıdtyń jeńisi de basynan belgili boldy. Makgregor tek fantastıkalyq kınoda ǵana jeńetin edi», - dedi Albert Aldııarov.
Djıý-djıtsý sportyna kelsek, munda basqa kúres túrlerimen uqsastyq kóp deıdi sportshy.
Onyń oıynsha, osyndaı uqsastyqtar bola tura basqa kúres ókilderimen boz kilemge shyǵý durys sheshim emes.
Sportshynyń aıtýynsha, djıý-djıtsý eń qaýipsiz sport túrine jatady.
«Eger judyryqtasýǵa jatatyn sport túrlerimen salystyrsa, kúres gýmandy sport túri. Boksta sportshy soqqyny qabyldap eki aıaǵynda tik tura almaıdy. Ol jaýap berýge tyrysady. Basynda soqqynyń kúshin qadaǵalaı almaıdy. Djıý-djıtsý men MMA arasyndada uqsastyq kóp. Qol, aıaqtan urý, parterde aıqasý. Nevazada tek qana kúres bolady»,- dedi Albert Aldııarov.
Albert Aldııarov sportqa 6 jasynda kelgen. Alǵashynda taı boksy, dzıýdoda baǵyn synaǵan. 22 jasynda djıý-djıtsýǵa aýysqan.
Djıý-djıtsý sportymen jas kezinde aınalysa bastaǵan durys deıdi maman.
«Sebebi osy jastan bastap sportqa kelgen balalardyń jetistikke jetý múmkindigi joǵary. Jas kezimde urý bóliminde kóbirek shyǵatynmyn. Qazir jasym kelgen soń nevazada beldeskendi kóbirek qalaımyn»,- dedi Albert Aldııarov.
Djıý-djıtsý sporty Qazaqstanda jańadan tanymal bolyp keledi. Atalǵan sportqa balalaryn berýge yntaly ata-analardyń sany kóbeıýde.
Alaıda, ol áli Olımpııalyq sport túrine jatpaıdy.
Óıtkeni Olımpııalyq kúreste kóptegen ádisterge tyıym salynǵan.
Barlyq qazaqstandyqtar sııaqty Albert te Golovkın- Kanelo jekpe-jegin asyǵa kútip júr. Ol otandasymyzdyń jeńetinine senimdi. Alaıda, upaımen be, álde nokaýtpen be ol jaǵyna boljam jasamady.
Aıta ketý kerek, Meıvezer-Makgregor jekpe-jeginde amerıkandyq boksshy 10 raýndta jeńiske jetken bolatyn .
