Meıveızer GGG-diń kóleńkesinde qalyp qoıamyn dep qorqady - Den Embroýz

ASTANA. QazAqparat - Floıd kishi Meıveızer ylǵı Golovkındi synap otyrady. Buǵan deıin ol GGG-ge salmaq dárejesin aýystyryp, Andre Ýord sııaqty boksshylarmen kezdesýge keńes berse, sońǵy kezde Gennadıı Golovkınniń bokstasý stılin synap, aldaǵy aıqasta Alvarestiń jeńetinine senimdi ekenin aıtyp keledi, dep habarlaıdy QazAqparat tilshisi.

Boxingnews24.com Den Embroýzdyń aıtýynsha, Meıveızer meksıkalyq boksshy Alvares úshin alańdap otyrǵan joq. Ol aldymen óz ataq-abyroıyn oılap otyr. "Shyny kerek, Golovkın Alvaresti jeńse, Meıveızerdiń jaǵdaıy qıyndaıdy. Sebebi Erıslandı Larany (bul jekpe jekte kóbisi Lara utty dep sanaıdy - avt.) bylaı qoıǵanda, "Kanelony" jeńgen - jalǵyz Meıveızer ǵana. Eger Golovkın Alvaresti utsa, onda tanymal boksshy "Alvaresti jalǵyz men ǵana jeńdim" degen ataǵynan aıyrylady. Floıd buny jaqsy biledi. Sodan bolar, "Manı" Alvarestiń jeńisinen qatty úmittenip otyr. Bylaısha aıtqanda, bul jeńisti qalaıdy, biraq shyn máninde oǵan senip otyrǵan joq",- dep jazdy Embroýz.

Amerıkalyq bapker Robert Garsııa da jýrnalıstiń pikirine qosylyp otyr. "Búginde barlyq jankúıerler Meıveızer qaıta oralsa, onyń Golovkınmen judyryqtasqanyn qalaıdy. Kezinde ol "Kanelony" ońaı jeńgen. Endi, Alvares GGG-di jeńse, Floıd Golovkındi de ońaı jeńemin dep shyǵa keledi. Sebebi kezinde Alvaresti esh qıyndyqsyz jeńgen. Sol sebepti ol meksıkalyq boksshynyń jeńgenin qalaıdy. Floıd ózin ǵana oılap otyr", - deıdi Garsııa.