Meıson Morellı bıyl «Barys» sapynda oınaıdy

ASTANA. KAZINFORM — «Barys» hokkeı klýby AQSh oıynshysy Meıson Morellımen birjaqty kelisimshartqa qol qoıdy. 

Shabýylshymen kelisim bir maýsymǵa eseptelip, 2026 jyldyń 31 mamyryna deıin kúshinde bolady.

Bul Morellıdiń Soltústik Amerıkadan tys alǵashqy kásibı tájirıbesi bolmaq. 2023 jyly ol «Hershı Bears» quramynda Kolder kýbogyn jeńip aldy. Sońǵy eki maýsymdy Meıson «Vegas Golden Naıts» júıesinde ótkizdi. Ótken maýsymda ol UHL-de bir matchqa qatysyp, sondaı-aq AHL-degi «Henderson Sılver Naıts» sapynda 48 oıynda 19 (13+6) upaı jınady.

Aıta ketsek, budan buryn elordalyq klýbpen AQSh hokkeıshileri Ien Makkosh, Maıkl Vekkone, Raılı Ýolsh, Taıs Tompson, kanadalyq Djeık Massı, reseılik Vladımır Volkov, Emıl Galımov, qazaqstandyq Kırıll Savıtskıı, Batyrlan Muratov, Roman Starchenkomen kelisimshartqa qol qoıdy.

Qazaqstandyq klýb Qurlyqtyq hokkeı lıgasyndaǵy jańa maýsymda alǵashqy úsh oıyndy elordada ótkizedi. Aldymen 7 qyrkúıekte Reseıdiń «Traktor» (Chelıabınsk) komandasymen kezdesse, odan keıin 9 qyrkúıekte «Amýr» (Habarovsk), 13 qyrkúıekte Belarýstiń «Dınamo» (Mınsk) klýbtarymen sheberlik baıqasady.