«Meıirimdi Qazaqstan» aktsııasy bastaldy: elimizde 10 kún boıy ıgi ister atqarylady

ASTANA. KAZINFORM – Qazaqstanda «Meıirimdi Qazaqstan» áleýmettik aktsııasy bastaý aldy. Bul bastama ózara qoldaý mádenıetin nyǵaıtýǵa, áleýmettik jaýapkershilikti arttyrýǵa jáne jastardy ıgi isterge tartýǵa baǵyttalǵan, dep habarlaıdy Mádenıet jáne aqparat mınıstrligi.

Aktsııa aıasynda elimizdiń óńirlerinde jastar uıymdary men eriktilerdiń qatysýymen qaıyrymdylyq jáne volonterlik is-sharalar kesheni ótkiziledi.

- Aktsııanyń on kúni jeke-jeke taqyryptarǵa arnalmaq. Atap aıtqanda, jalǵyzbasty zeınetkerlerge kómek kórsetý, qarttar men balalar úılerin qoldaý, medıtsınalyq mekemelerde donorlyq aktsııalar ótkizý, az qamtylǵan otbasylarǵa ataýly kómek kórsetý, sondaı-aq kommýnaldyq qyzmet qyzmetkerlerin qoldaýǵa baǵyttalǵan qoǵamdyq bastamalar júzege asyrylady, - delingen aqparatta.

Bastama Shyǵys Qazaqstan oblysyndaǵy Jastar resýrstyq ortalyǵynyń alańynda bastaldy. Aktsııa elimizdiń barlyq óńirlerin qamtıdy.

Aıta keteıik, Qasym-Jomart Toqaev «Meıirim» ordenin taǵaıyndady.