Meıirim Nursultanovtyń WBC tıtýly úshin jekpe-jegi ótýine bir kún qalǵanda toqtatyldy
ASTANA. KAZINFORM – Qazaqstandyq boksshy Meıirim Nursultanov pen amerıkalyq kishi Hesýs Ramos arasyndaǵy WBC tujyrymy boıynsha orta salmaqtaǵy ýaqytsha chempıondyq ataq sarapqa salynatyn jekpe-jek ótpeıtin boldy.
Bul týraly San-Dıegoda ótken resmı salmaq ólsheý rásimi kezinde málim boldy.
WBC aqparatyna sáıkes, beısenbige qaraǵan túni Hesýs Ramostyń densaýlyǵy syr berip, oǵan medıtsınalyq kómek kórsetý úshin San-Dıego mańyndaǵy aýrýhanaǵa jetkizilgen. Tekserý men emnen keıin boksshy juma kúni tańerteń aýrýhanadan shyǵaryldy.
Kishi Hesýs Ramos orta salmaqtaǵy WBC ýaqytsha chempıony ataǵyn alǵash ret qazaqstandyq Meıirim Nursultanovqa qarsy jekpe-jekte qorǵaýy tıis edi.
2023 jyldan beri rıngke shyqpaǵan Meıirim Nursultanov jekpe-jektiń toqtatylýyna qatysty pikir bildirdi.
– Kelesi aptadan bastap promoýterlermen kelissóz ústeline otyryp, aldaǵy qadamdardy talqylaımyz. Qaı chempıonnyń bos ekenin qaraımyz jáne kez kelgen qarsylaspen rıngke shyǵýǵa daıyn bolamyz. Men ońaı jol izdemeımin. Maǵan myqty qarsylastar kerek. Eger chempıon bolsa – chempıonmen, laıyqty úmitker bolsa – onymen judyryqtasamyz. Biz daıynbyz. Budan da myqty bolyp oralamyz, – dedi Meıirim Nursultanov.
Buǵan deıin Ramos – Nursultanov jekpe-jeginiń jeńimpazy WBC nusqasy boıynsha álem chempıony, domınıkandyq Karlos Adamespen kezdesýge mindetti úmitker atanýy tıis bolǵan.
Aıta keteıik, tamyzdyń basynda Meıirim Nursultanovtyń eki jyldan keıin ǵana sharshy alańǵa shyǵatyny habarlandy.
