Meıirim Nursultanovtyń Karlos Adamespen jekpe-jegi nege kesheýildedi
ASTANA.KAZINFORM - WBC nusqasy boıynsha orta salmaqtaǵy reıtıngide birinshi orynda turǵan qazaqstandyq kásipqoı boksshy Meıirim Nursultanov belbeý ıegeri Karlos Adamespen jekpe-jegi nege ýaqytyly ótpeı jatyr? Onyń sebebine Kazinform tilshisi úńilip kórdi.
Qazaqstandyq sportshy álem chempıony ataǵy úshin jekpe-jekke mindetti úmitker bolyp sanalady. Alaıda belbeý ıegeri Karlos Adamespen jekpe-jek osy ýaqytqa deıin bolǵan joq.
Kásipqoı boksta jeńilistiń aşy dámin tatyp kórmegen Meıirim Nursultanov sońǵy kezdesýin 2023 jyldyń qarasha aıynda ótkizdi. Ózbekstan astanasy Tashkent qalasynda ótken jekpe-jekte ol tóreshilerdiń biraýyzdan sheshimimen chılılik Hýlıo Alamosty tize búktirdi. Ol qazir WBC nusqasy boıynsha orta salmaqtaǵy chempıon Karlos Adameske qarsy tıtýldyq jekpe-jekti kútip, oǵan mindetti úmitker retinde sanalyp otyr.
Qazaqstan kásipqoı boks federatsııasyn otandasymyzdyń uzaq ýaqyt boıy jekpe-jek ótkizbeýi alańdatyp otyr. Federatsııa prezıdenti Rahymjan Erdenbekov boksshy ol jaıynda WBC prezıdenti Maýrısıo Súleımanmen jeke talqylaǵanyn aıtty.
- WBC sońǵy konventsııasynda men Meıirim Nursultanov týraly máseleni jeke ózim kóterdim, WBC prezıdenti Maýrısıo Súleımanmen onyń vızasy týraly máseleni talqyladym. Sebebi Nursultanov úshin tek vıza máselesi qıyndyq týdyryp otyr. Ol amerıkalyq vızany ala almaıdy. WBC bul vıza boıynsha kómektesetinine ýáde berdi. Degenmen Nursultanov Adamespen jekpe-jegi aldynda taǵy bir kezdesý kútip tur. Sodan keıin chempıondyq jekpe-jekke daıyndalady, - dep sendirdi Rahymjan Erdenbekov.