Meıirim Nursultanov eki jyldan keıin sharshy alańǵa shyǵady: qarsylasy belgili boldy
ASTANA. KAZINFORM – Qazaqstandyq kásipqoı boksshy Meıirim Nursultanov (20-0, 11 KO) 2026 jyldyń 19 qyrkúıeginde AQSh-tyń San-Dıego qalasynda (Kalıfornııa shtaty) ótetin boks keshinde orta salmaqtaǵy WBC ýaqytsha álem chempıony ataǵy úshin sharshy alańǵa shyǵady, dep habarlaıdy informsports.kz.
Premier Boxing Champions (PBC) uıymy bul tıtýldyq kezdesýdi resmı túrde jarııalady.
Otandasymyzdyń qarsylasy qazirgi ýaqytsha belbeý ıegeri, amerıkalyq – Hesýs Ramos (kishi) (24-1, 19 KO).
Atap óter jaıt, Meıirim Nursultanov buǵan deıin sharshy alańǵa 2023 jyldyń qarashasynda Tashkentte shyǵyp, chılılik Hýlıo Alamosty jeńgen bolatyn. Sodan beri AQSh vızasynyń keshigýine baılanysty eki jyldan astam ýaqyt boıy jekpe-jek ótkize almaı keldi.
Búkilálemdik boks keńesiniń (WBC) prezıdenti Maýrısıo Sýleımannyń málimdeýinshe, Nursultanov pen Ramos arasyndaǵy aıqastyń jeńimpazy orta salmaqtaǵy tolyqqandy álem chempıony, domınıkandyq Karlos Adamespen mindetti túrde kezdesý quqyǵyna ıe bolady.
– Bul jekpe-jekti men taǵatsyzdana kúttim. Oǵan jetý úshin úlken shydamdylyq pen toqtaýsyz eńbek qajet boldy. Artyq áńgimeniń qajeti joq, men jeńiske tolyqtaı daıynmyn, - dedi Meıirim Nursultanov.
Buǵan deıin boksshy Jánibek Álimhanuly AQSh-qa barýǵa daıyndalyp jatqanyn jazǵan edik.
