Meıirlan Maksım dzıýdodan Álem chempıonatyn jaraqaty saldarynan erte aıaqtady

ASTANA. KAZINFORM - Majarstan astanasy Býdapeshtte ótip jatqan dzıýdodan Álem chempıonatynda Qazaqstan quramasynan búgin, 17 maýsymda Meıirlan Maksım (90 keli) synǵa tústi.

Eresekter sapyndaǵy alǵashqy álem chempıonatyna alǵash ret qatysyp otyrǵan 21 jastaǵy Meıirlan úshinshi aınalymda jarys jolyn aıaqtady.

Bul kezdesýde ol jaraqat alyp qaldy. Saldarynan jarys jolynan shyqty. Ol álem chempıony japonııalyq Gokı Tadjımaǵa qarsy beldesýde belsendi kúres kórsetip, qarsylasynan eki shıdo basym turdy. Alaıda, Gokı Tadjımanyń (o soto gaeshi) qarsy ádisine sátsiz túsip, jaraqat alýyna baılanysty jeńis japonııalyq dzıýdoshyǵa berildi.

Osylaısha, 21 jasar Meıirlan Maksım óziniń eresekter sapyndaǵy alǵashqy álem chempıonatyn úshinshi aınalymnan toqtatty.

Meıirlan alǵashqy aınalymda frantsııalyq Aleksıs Metıýdi sońǵy sekýndta «ıýko» upaıymen jeńse, odan keıin domınıkandyq Robert Florentınony qapy qaldyrdy.

Sondaı-aq 18 maýsymda Nurlyhan Sharhan (100 keli) jáne Marat Baıkamýrov (100 keli), 19 maýsymda Erasyl Qajybaev (100 keliden joǵary) júldeni sarapqa salady.

Qazirge deıin álem chempıonatynda el quramasynan Ábıba Ábýjaqynova (48 keli) kúmis júldeger atansa, Maǵjan Shamshadın (60 keli), Sherzod Davlatov (60 keli), Ǵalııa Tynbaeva (48 keli), Ǵusman Qyrǵyzbaev (66 keli), Eset Qýanov (72 keli), Esmıgúl Kýıýlova (63 keli), Abylaıhan Jubanazar (81 keli) jarysty erte aıaqtady.

Dzıýdodan álem chempıonaty 13-20 maýsym aralyǵynda ótedi. Onda 92 elden kelgen 566 sportshy 14 salmaqta júldege talasady.