Meıirgerlerdiń ókilettigi keńeıip, dáriger qabyldaýyn kútý ýaqyty qysqardy
ASTANA. KAZINFORM — Búginde medıtsınalyq-sanıtarııalyq alǵashqy kómek júıesinde meıirgerlerdiń ókilettigi keńeıtilip, bul dárigerlerge túsetin júktemeni jáne qabyldaýdy kútý ýaqytyn azaıtýǵa múmkindik berdi. Bul týraly Densaýlyq saqtaý mınıstrligi málim etti.
Vedomstvonyń málimetinshe, jalpy praktıka dárigerleriniń josparly qabyldaýyn kútý merzimi 7–10 kúnnen 2–3 kúnge deıin qysqardy. Sonymen qatar, halyqty alǵashqy medıtsınalyq kómekpen qamtý deńgeıi 60%-dan 80%-ǵa deıin artty.
Meıirgerlik qabyldaý aıasynda patsıentter:
— bastapqy konsýltatsııa;
— dárilik zattarǵa retsept;
— beıindi mamanǵa joldama ala alady.
Keńeıtilgen praktıka sheńberinde meıirgerler sondaı-aq:
• dárigerge deıingi tekserý júrgizedi (qan qysymyn, boı men salmaqty ólsheý, terini, lımfa túıinderin, isikterdi qaraý);
• onkologııalyq belgilerdi erte anyqtaý úshin aýyz qýysy men sút bezderin tekseredi;
• júrek-qantamyr aýrýlarynan bastap onkologııalyq dertterge deıingi aýrýlar qaýpin baǵalaý úshin saýalnama men chek-paraqtardy qoldanady.
Derbes meıirgerlik qabyldaý dárigerdi almastyrmaıtynyn aıta ketken jón. Ol bekitilgen reglamentter men sapany baqylaý júıesi sheńberinde qatań túrde júzege asyrylady, bul patsıentterdiń qaýipsizdigine kepildik beredi.
DSM ótken jyldan bastap onkologııalyq skrınıngter TMKKK paketine engizilip, bul 300 myń saqtandyrylmaǵan azamat úshin tekserýlerdiń qoljetimdiligin qamtamasyz etetinin eske saldy.
Sozylmaly aýrýlary bar patsıentterdi dınamıkalyq baqylaýmen qamtý deńgeıi 30%-dan 52%-ǵa deıin keńeıgen.
Aıta keteıik, buǵan deıin Qazaqstanda kókjótelmen aýyrǵandar sany 2,4 ese azaıǵanyn jazdyq.
