Meıirgerler qabyldaý júrgizedi: jańa júıe tıimdi me
ASTANA. KAZINFORM — Ótken joly elimizde alǵashqy medıtsınalyq kómektiń jańa modeli engizilgeni týraly jazǵan edik. Ózgeris boıynsha endi emhanalarda meıirgerler de naýqas qabyldaı alady.
Pılottyq joba alǵash ret byltyr qyrkúıek aıynda Elordadaǵy № 5 qalalyq emhanasynda júzege asa bastady. Júıe jumysty jeńildetti me? Jańa tájirıbe qanshalyqty tıimdi? Kazinform tilshisi anyqtap kórdi.
— Jańa júıege sáıkes, meıirgerler dárigerge deıingi barlyq qyzmetterdi ózderi kórsetedi. Mysaly, ınsýlttiń aldyn alý, onkologııalyq aýrýlardy boldyrmaý maqsatynda turǵyndardy emhanaǵa shaqyramyz. Qajetti anketalar toltyrylady, turǵyndardyń skrınıngten ótken-ótpegenin, qandaı vaktsına alǵanyn nemese almaǵanyn anyqtaımyz. Sonymen qatar, buıryqqa sáıkes dıspanserlik esepte turǵan naýqastardyń dári-dármekti ýaqytyly alýyn qadaǵalaımyz. Qabyldaýǵa kelgen árbir patsıenttiń jyl saıyn tapsyrýy tıis analızderi men ÝZI sııaqty dıagnostıkalyq tekserýlerden ótý barysyn tekseremiz. Birneshe saýalnama júrgizip, dárigerdiń qabyldaýyna barǵanda qajet bolatyn barlyq aqparat pen analızderdi tolyqtaı daıyn kúıinde ótkizemiz, — deıdi emhana meıirgeri Aıman Nurǵalıeva.
Jańa algorıtm boıynsha meıirgerler 1 aıǵa jospar qurady. Keıin sol jospar boıynsha kúnine 20-ǵa jýyq naýqasty ózdiginen qabyldaıdy eken.
— Men bir aıǵa aldyn ala jospar jasaımyn. Ol úshin arnaıy grafık túziledi. Mysaly, maǵan erteń keletin naýqastardy búgin qarap, barlyq qajetti aqparatty aldyn ala daıyndap qoıamyn. Patsıentterdi ózimiz telefon arqyly shaqyramyz. Kelgen adamdy tolyqtaı tekserýden ótkizip, jaǵdaıyna qaraı tıisti mamanǵa joldaımyz. Qazir kúnine 15–18 patsıentke deıin qabyldaımyz. Mysaly, búgin 20 adamdy qabyldaýǵa jazylsa, olardyń bári kele bermeıdi, — deıdi maman.
Aıman Nurǵalıeva jańa júıede jumys isteýdi áli de úırenip júrgenin aıtady. Onyń sózinshe, bul tártipke naýqastar da rıza.
— Jańa júıe boıynsha qyzmet alyp júrgen naýqastar rıza. Artyq júgiristiń azaıǵanyn aıtyp jatyr. Dárigerdiń qabyldaýynda uzaq ýaqyt kezekte turǵansha, aldymen bizge kelip, dárigerge deıingi qyzmetterdi alǵan olar úshin áldeqaıda tıimdi. Jalpy, bul jańa júıe boıynsha jumys isteýdi áli de meńgerip jatyrmyz. Degenmen, onyń tıimdi tustary kóp ekenin kórip otyrmyz, — deıdi meıirger.
Meıirgerdiń bul sózin emhanada em alatyn naýqastar da rastap otyr. Qala turǵyny meıirgerlerdiń jumysyna alǵashynda tańqalǵanyn da jasyrmady.
— Meniń gıpertonııalyq aýrýmen esepte turǵanyma 10 jyl boldy. Meıirgerlerge razymyn. Olar ózderi habarlasyp, shaqyrady. Buryn ózimiz kelip, kabınetten kabınetke júgirip júrýshi edik. Meıirgerler tekserip, bárin ózderi aldyn ala daıyndaıdy. Buryn mundaıdy kórmegen soń alǵashynda tańqaldyq. Qazir dárimizdi de ýaqytyly alyp otyrmyz, — deıdi Janar Anatbaeva.
№ 5 qalalyq emhanasy jańa júıedegi tájirıbesin elimizdiń barlyq óńirinen kelgen dárigerlermen bólisipti. Al ózderi bul tásildi jyl basynan beri óndiristik jumys tártibine tolyq engizip úlgergen.
— Qazir bizde joǵary bilimi bar 13 meıirger naýqastardy qabyldap jatyr. Olardyń alǵan joǵary bilimimen qosa, aldymen naýqastardy qabyldaý jumystaryn da tolyqtaı úırettik. Sol tájirıbemizdi ózge óńirlermen de bólistik. Mınıstrliktiń buıryǵy boıynsha barlyq óńirden 5 bas dáriger kelip, jańa júıemen tanysty. Jańa júıege qatysty patsıentterden de jaqsy pikirler kelip jatyr. Meıirgerlerge de osylaı jumys istegen unady, — deıdi emhana dırektory Altynshash Tabýldına.
