Meıirǵat Amangeldın: «Núkte» telehıkaıasy lýdomanııadan keıingi ómir týraly

ASTANA. KAZINFORM — «Jibek joly» arnasy men «ıÝnıko Pleı» platformasynyń alǵashqy birlesken jobasy — «Núkte» telehıkaıasy 1 jeltoqsannan bastap kórermenge jol tartady. Bul týraly akter Meıirǵat Amangeldın Jibek Joly telearnasynyń Búgin LIVE baǵdarlamasynda aıtty.

Akterdiń aıtýynsha, jańa telehıkaıa 20 bólimnen turady, ár serııa shamamen 40-45 mınýtqa sozylady.

— Túsirilim alańynda 40 kúnnen astam boldym. «Núkte» degen úlken maǵynaly uǵym. Adamnyń ótken ómirindegi jaǵymsyz tustarǵa núkte qoıýǵa qatysty. Orta jastaǵy Danııar esimdi jigittiń qumar oıynǵa táýeldi bolyp, onyń sońynda qandaı jaǵdaılarǵa tap bolǵany, odan keıingi ómiri baıandalady. Kóbine qumar oıynnyń saldary men adam taǵdyry kórsetiledi, — dedi ol.

Meıirǵat Amangeldın úsh rejıssermen qatar jumys isteý shyǵarmashylyq turǵyda úlken tájirıbe bolǵanyn aıtty.

— Úsh rejısserdiń oıy keıde ártúrli bolady. Tipti qaljyńdap, «úsheýińizge úsh túrli oınap bereıin» degen kezderim de boldy. Ár rejısserdiń jumys tásili bólek. Akter retinde tez beıimdelýge úlken mektep, — dedi akter.

Ol sondaı-aq telehıkaıa qoǵamda jıi aıtylatyn, biraq tolyq ashylmaıtyn máselelerge jaýap beretinin atap ótti.

— Biz kóbine lýdomanııa týraly aıtamyz, biraq odan arylǵan adamnyń keıingi ómiri qandaı bolatynyn bilmeımiz. Bul serıal osy suraqtarǵa jaýap beredi dep oılaımyn. Qazir ondaı jaǵdaıǵa tap bolǵan tanystar árkimde bar. Ózim de stýdenttik kezimde eki aıdaı sondaı tájirıbem bolǵan. Keı sátterde sol ótken kúnderimmen baılanystyryp oınadym. Bundaı jaǵdaı adamnyń ishki jan dúnıesine aýyr tıetin másele, bir aýyz sózben sheshilmeıdi. «Núkte» telehıkaıasy osynyń bárin kórsetedi, — dedi Meıirǵat Amangeldın.

Buǵan deıin Otandyq fılm halyqaralyq kınofestıvaldyń laýreaty atanǵanyn jazǵanbyz.

Elimizde lýdomanııa dıagnozy neshe adamǵa qoıyldy.

Sonymen qatar lýdomanııa degen ne, onyń oıynqumarlyq, maskúnemdik pen nashaqorlyqtan aıyrmashylyǵy bar ma? Bul týraly Kazinform agenttiginiń materıalynan oqı alasyz.