Meıramhanalarǵa taǵam qunarlylyǵyn kórsetý mindetteletin bolady
ASTANA. QazAqparat - Aldaǵy ýaqyttarda elimizdiń meıramhanalarynda taǵam qunarlylyǵyn kórsetý mindetti bolady. Bul týraly búgin Senattyń jalpy otyrysy barysynda málim boldy. Eske salaıyq, palata depýtattary «Qazaqstan Respýblıkasynyń keıbir zańnamalyq aktilerine tutynýshylar quqyǵyn qorǵaý máseleleri boıynsha ózgerister men tolyqtyrýlar engizý týraly» QR Zańyn qabyldaǵan bolatyn.
Qujatty talqylaý barysynda senator Murat Baqtııaruly damyǵan memleketterdiń kópshiligindegi erekshelikterge nazar aýdardy. «Olardyń tamaqtaný oryndarynda, meıramhanalar men kafelerde tamaqtyń as máziri tusynda ár taǵamnyń qansha kalorııadan turatyny jazylady: qansha aqýyz, qansha krahmal bar ekeni, tipti qansha tuz qosylǵany da jazylady. 2016 jyldan bastap Eýropalyq Odaq memleketteriniń bári osy standarttarǵa kóship jatyr. Shyndyǵynda bul bizdiń azamattarymyzdyń durys tamaqtanýyna jaǵdaı týǵyzatyn faktilerdiń biri. Qazaqstanda tamaqtandyrý oryndary da kóp. Endeshe, tutynýshylardyń tamaqtaný salasyndaǵy tańdaý quqyǵy qalaı qamtylady?» - dedi senator M. Baqtııaruly.
Óz kezeginde Ulttyq ekonomıka mınıstri Erbolat Dosaev bul norma Ekonomıkalyq yntymaqtastyq jáne damý uıymyna múshe elderdiń standartyna saı keletinin atap ótti. «Qazaqstan EYDU-ǵa enýdi josparlaıdy. Biraq, biz ondaı normany osy zańǵa engizgen joqpyz. Degenmen, bul normalardy qarastyryp jatyrmyz. Densaýlyq saqtaý mınıstrligimen birlesip, as mázirinde qandaı ıngredıentter bolýy kerektigin talqylap jatyrmyz. Bıylǵy jyldyń sońyna deıin osy baǵyttaǵy ózgeristerdi ázirleımiz. Sondyqtan, ondaı normamen kelesi jyly Parlamentke keletin bolamyz», - dedi mınıstr E. Dosaev.
