Meıramhanalarda jıi kezdesetin quqyqbuzýshylyq: ne isteý kerek

ASTANA. KAZINFORM – Mańǵystaý oblysynda meıramhana toıǵa aldyn ala tólengen qarajatty qaıtarýdan bas tartqan. Bul týraly Saýda jáne tutynýshylardyń quqyqtaryn qorǵaý departamenti habarlady.

10 tamyzda Munaıly aýdanynda áıel mereke ótkizý úshin 30 myń teńgeni aldyn ala tólegen. Aqsha qolma-qol berilgenimen, túbirtek te, kelisimshart ta usynylmaǵan.

14 qyrkúıekke josparlanǵan toı otbasyndaǵy qaıǵyly jaǵdaıǵa baılanysty bolmaıtyny 10 qyrkúıekte belgili bolyp, bul týraly meıramhana ákimshiligine aldyn ala habarlanǵan. Degenmen, mekeme ókilderi qarajatty qaıtarýdan bas tartyp, «aqsha berilmeıdi» dep jaýap bergen.

QR «Tutynýshylardyń quqyqtaryn qorǵaý týraly» zańy boıynsha, eger qyzmet kórsetilmese jáne naqty shyǵyn bolmasa, tutynýshy aldyn ala tólegen somany tolyq kólemde qaıtaryp alýǵa quqyly.

Jábirlenýshi osyǵan baılanysty Mańǵystaý oblysy boıynsha Saýda jáne tutynýshylardyń quqyqtaryn qorǵaý departamentine shaǵymdandy. Tekserý qorytyndysymen aqshasy tolyq qaıtarylyp, quqyǵy qorǵaldy.

Aıta keteıik, Qyzylorda jylý elektr ortalyǵy tutynýshylardyń qarajatyn qaıtardy.