Meıramhanada tamaqtanar aldynda duǵa etkenderge 15% jeńildik jasalǵan
ASTANA. QazAqparat - Amerıkanyń Soltústik Karolına shtatynyń Mary's Gourmet Diner meıramhanasynyń ıeleri aldyna qoıylǵan asty isher aldynda duǵa etkenderge 15 paıyz jeńildik jasaǵan, dep habarlaıdy HLN.
Tamaqtaný mekemesiniń ıesi Merı Haglýnd mundaı jeńildikterdiń únemi jasala bermeıtinin jetkizdi. Shilde aıynyń aıaǵynda restoran qonaqtarynyń biri óziniń Facebook-tegi paraqshasynda jeńildik jasalǵan chektiń sýretin jarııalaǵan bolatyn. Nebári birneshe kún ishinde bul sýretke laık basqandar sany 10 myńǵa jýyqtaǵan. Sondaı-aq atalmysh meıramhananyń áleýmettik jelidegi paraqshasyna jazylýshylar sany da eki esege jýyq ósken. Merı Haglýndtiń aıtýynsha, olar mundaı sharany tórt jyldan beri qolǵa alyp keledi. «Men muny mindetti talap retinde engizgen emespin, alaıda ústel basynda as isher aldynda duǵa etip otyrǵan adamdy kórsem, mindetti túrde oǵan alǵan tamaǵy úshin tólemderinde jeńildik jasap, osylaısha alǵysymdy bildiremin», - deıdi ol.
