Meırambek Nazarqojaev — Danııanyń Koroldik teatryna qabyldanǵan tuńǵysh qazaq

— Aýyldyń qarapaıym balasymyn. Almaty oblysy, Іle aýdany, Qaraoı aýylynda dúnıege kelgenmin. Kishkentaı kezimde menen jaqsy fýtbolshy shyǵady dep aıtatyn. Biraq anamnyń jaqyndary usynys jasap, osy salaǵa keldim. Baletke 10 jasymda bet burdym. Oqýda ozat boldym, 8 jylda halyqaralyq konkýrstarda laýreat boldym. Armanym shetelde shyńdalý boldy, soǵan qadam bastym, — deıdi ol.

Óner ıesiniń alǵashqy belesi Máskeýmen baılanysty. Bul kezeń jas ártis úshin kásibı qalyptasýdyń satysyna aınalǵan.

— Reseı — álemge tanymal horeograftar men bıshilerdiń otany. Máskeýde Russian State Ballet trýppasyna qabyldandym. Trýppanyń kórkemdik jetekshisi Vıacheslav Gordeev maǵan senim artyp, úlken rólderdi berip otyrdy. Sol kisiniń qol astynda Germanııa, Shveıtsarııa, Avstrııa, Qytaıdyń úlken sahnalarynda jáne Úlken teatr, Kremlde jetekshi partııalardy somdadym, — deıdi spıker.

Keıin bul jol Germanııaǵa jalǵasyp, jańa orta men jańa talaptar ártistiń kókjıegin keńeıtken.

— Germanııanyń Kıl qalasynda Qazaqstannan bıshiler burynnan beri óner kórsetetin. Ol shaǵyn teatr bolǵanmen, deńgeıi óte joǵary. Sol jerde tyńdalymnan ótip, arnaıy shaqyrý aldym. Alǵashynda aǵylshyn tilin bilmegendikten qınaldym. Biraq teatr dırektory, Ýkraınada týǵan, oryssha biletin ıAroslav Ivanenko kóp kómektesti. Jattyǵýlarda túsinbeı jatsam, oryssha túsindiretin. Sonymen qatar qazaqstandyq ártister de qoldaý kórsetti. Sol sebepti ortaǵa tez sińip, aǵylshyn tilin  jyldam úırendim, — deıdi ol.

Tájirıbeniń barlyǵy ony Eýropadaǵy eń bedeldi sahnalardyń birine alyp keldi.

— Danııa koroldik teatrynyń úsh júz jyldyq tarıhy bar. Eýropadaǵy eń kóne teatrlardyń biri. Onda jumys isteýdi armandamaıtyn ártis joq shyǵar. Men de aldymen túıindememdi jiberdim. Júzge jýyq úmitkerdiń ishinen 10-15 adamdy iriktep, arnaıy synaqqa shaqyrdy. Sonyń ishinde tek eki ártis qana qabyldandy. Men sol irikteýden ótip, teatr trýppasyna qosyldym. Qazir osy tarıhı sahnada eńbek etip kelemin. Sonymen qatar Danııa koroldiginiń joǵary marapatyn da aldym, — dedi Meırambek Nazarqojaev.

Teatrdyń taǵy bir ereksheligi — ártisterge beriletin áleýmettik kepildik.

— Ómir boıyna kelisimshart jasastyq. Bul — úlken qoldaý. Qalasań, odan bas tartýǵa bolady. Qazaqstanda bul júıe qalaı jumys isteıtinin naqty bilmeımin, biraq osyndaı tájirıbe engizilse eken deımin, — deıdi balet ártisi.

Meırambek Nazarqojaev týǵan elmen baılanysyn úzgen joq. Kerisinshe, jınaǵan halyqaralyq tájirıbesin Qazaqstanǵa ákelýdi kózdeıdi. Osy baǵytta ol otandyq áriptesterimen birge Nomad Ballet Project jobasyn iske qosty. Joba aıasynda Kanada, AQSh, Japonııa, Portýgalııa, Ońtústik Koreıa, Polsha elderinen kelgen Danııa Koroldik teatrynyń jetekshi ártisteri Almaty Theatre sahnasynda óner kórsetip, kórermenniń joǵary baǵasyna ıe boldy.

Sonymen qatar joba tek sahnalyq qoıylymdarmen shektelmeı, kásibı tájirıbe almasýǵa da jol ashty. Atap aıtqanda, balet ártisteri men Býrnonvıl tehnıkasynyń sheberi Dınna Bern Almaty horeografııa ýchılışesiniń stýdentterine arnaıy sheberlik sabaqtaryn ótkizip,  tájirıbesimen bólisti.

Aldaǵy ýaqytta bastama jalǵasyn tappaq. Endigi kezekte elorda kórermenderin erekshe mádenı kesh kútip tur.

— 5 sáýir kúni Astanada Danııa Koroldik teatrynyń gala keshi ótedi. Jańa tehnıka, jańa ásermen bólisýge asyqpyz. Bolashaqta da el kórip, jer kórip, tolyqqandy tájirıbe jınaǵan soń elge túpkilikti oralýdy oılaımyn. Bar maqsatym — bilgenimdi jas býynǵa úıretý, — deıdi ol.

Aıta keteıik, Beıjińde Qazaqstan men Qytaıdyń ózara mádenıet jylynyń ashylý saltanaty ótti.