Meırambek Besbaev pen Sáýle Rahmetova «Eki juldyz» teledýmanynyń jeńimpazdary atandy
ASTANA. Jeltoqsannyń 28-i. QazAqparat /Marlan Jıembaı/ - San myńdaǵan kórmendi senbi kúni keshkisin kógildir ekran aldyna jınaǵan «Qazaqstan» telearnasynan tikeleı efır arqyly «Eki juldyz» teledýmanynyń aqtyq baıqaýy ótti.
Qyrkúıektiń 24-inde bastalyp, kórermenniń kózaıymyna aınalǵan baǵdarlamanyń jeńimpazdary - qazylar alqasy men kórermenderdiń bergen daýystardyń nátıjesi boıynsha Meırambek Besbaev pen Sáýle Rahmetova boldy.
Jeńimpazdardy quttyqtaý rásimde sóz sóılegen telearnanyń basqarma tóraǵasy Janaı Omarov «Eki juldyz» jobasynyń eń úlken, eń mańyzdy nátıjesi halyqtyń kóńilinen shyǵyp, halyqtyq saýyq-dýmanǵa aınalǵandyǵy ekendigin atap ótti.
«Eki juldyz» jobasynyń jeńimpazdaryn men shyn júrekten quttyqtaımyn. Biraq, bul jobada eshkim jeńilgen joq. Menińshe, osy jobaǵa qatysqan 16 jup ta jeńimpaz dep ataýǵa laıyq. 4 aıǵa sozylǵan joba búgin bitedi, degenmen tolyǵymen aıaqtalmaıdy. «Qazaqstan» ulttyq telearnasy osy jobany kórermender ótinishteri boıynsha keler jyly da jalǵastyrady. Jańa jylda jańa talanttar qatarymyzǵa qosylsyn. Osy jobada biz tek qana 2 juldyzdy emes 32 juldyzdy jandyrdyq», dedi óz sózinde telearna basshysy.
Teledýmanǵa qatysqan juptar arnaıy dıplomdarmen, baǵaly syılyqtarmen marapattaldy.
Aıta keteıik, bul baǵdarlamaǵa Almas Kishkenbaev, Aıgúl Imanbaeva, Tolqyn Zabırova, Móldir Áýelbekova, Jubanysh Jeksenuly, Sáken Maıǵazıev, Aqjol Meıirbekov, Meırambek Besbaev syndy óner juldyzdarymen qatar elimizge tanymal Parlament depýtattary, teatr, tsırk maıtalmandary qatysqan bolatyn.
