Meıram qarsańynda azyq-túlik baǵasy sharyqtap ketpesin - Ońdasyn Orazalın

AQTÓBE. QazAqparat – Aqtóbe oblysynyń ákimi azyq-túlik baǵasyn baqylaýda ustaýdy tapsyrdy, dep habarlaıdy QazAqparat tilshisi oblys ákiminiń baspasóz qyzmetine silteme jasap.

Kóterme jáne bólshek saýdada baǵa ósýi múmkin. Oblys ákimi Ońdasyn Orazalın kásipkerlik basqarmasy basshysynyń mindetin atqarýshy Gúlshat Berqalıevaǵa Aqtóbe qalasy ákimdigimen birge jospar boıynsha baǵany baqylaýdy tapsyrdy. Sonymen qatar, janar-jaǵarmaı baǵasynyń qymbattap ketpeýin qadaǵalaý qajettigi aıtyldy.

«Meıramǵa qarsy baǵa sharyqtamaýy qamtamasyz etilsin, ınflıatsııany respýblıkalyq mánnen joǵary emes deńgeıde ustaý qajet», - dep atap ótti Ońdasyn Orazalın.

Sondaı-aq, aımaq basshysy tótenshe jaǵdaılar departamenti bastyǵynyń mindetin atqarýshy Asqar Tóleshovke meıram kúnderi qaýipsizdik sharalaryn kúsheıtýdi, ıaǵnı, órt qaýipsizdigi, taıǵaq joldarǵa qum, tuz sebýdi tapsyrdy. Oblystyq polıtsııa departamenti bastyǵynyń birinshi orynbasary Qanat Álıevke jol-kólik qozǵalystaryn retteý, qoǵamdyq oryndarda azamattardyń qatań tártip saqtaýyn qadaǵalaýy kerektigin aıtty.

«Aýa raıynyń kúrdeli jaǵdaıyn eskere otyryp, joldaǵy avtokólik qozǵalysynyń qaýipsizdigi, joldar men trotýarlardy qar men muzdyń jınalýynan ýaqytyly tazalap, qazandyq jáne maı quıý stantsııalaryn otyn qorymen qamtamasyz etýdi baqylaýda ustańyzdar» , - dedi óńir basshysy.