Meıirjan Tórebaev pen Meıirhan Shernııazovqa qatysty sot qaýlysy ózgerissiz qaldy

ALMATY. QazAqparat - Almaty qalalyq qylmystyq ister jónindegi sot alqasy «Mudarabah Capital» qarjylyq pıramıdasyna qatysy bar degen kúdikke ilingen vaınerler Meıirjan Tórebaev pen Meıirhan Shernııazovty on táýlikke qamaýǵa alý túrindegi bultartpaý sharasyn ózgerissiz qaldyrdy, dep habarlaıdy QazAqparat tilshisi.

«Almaty qalasynyń qylmystyq ister jónindegi sot alqasynyń qaýlysymen budan buryn Almaty qalasynyń tergeý sotynyń qaýlysymen shyǵarylǵan Meıirjan Tórebaev pen Meıirhan Shernııazovqa qatysty on táýlik merzimge qamaýǵa alý túrindegi bultartpaý sharasy sanktsııalandy. Atalmysh sottyń qaýlysy ózgerissiz qaldyryldy. Atalǵan iske qatysty ózge de aqparatty QR Qylmystyq protsessýaldyq kodeksiniń 201-babyna saı tergeý oryndarynan bilýge bolady», - dedi Almaty qalalyq soty baspasóz qyzmetiniń ókili Abaı Jarylqasyn.

Aıta ketsek, sot aktisine qatysty kúdiktilerdiń ókilderi apellıatsııalyq shaǵym túsirgen bolatyn.

19 sáýir kúni Almatyda «Mudaraban Capital» qarjy pıramıdasynyń tórt uıymdastyrýshysy qamaýǵa alynǵany týraly jazǵan bolatynbyz.

Keıin tanymal vaınerler Meıirjan Tórebaev pen Meıirhan Shernııazov 10 táýlikke qamaýǵa alyndy.