«Meıirimdilik pen dostyq jolymen» kerýeni Jezqazǵanda boldy

JEZQAZǴAN. QazAqparat – 11 mamyr kúni «Meıirimdilik pen dostyq jolymen» kerýeni Jezqazǵan qalasyna keldi. Qala turǵyndary úshin beıneleý jáne sándik-qoldanbaly óner boıynsha sheberlik sabaqtar, dárister, ekologııalyq aktsııalar jáne sporttyq jarystar ótkiziledi, dep habarlaıdy QazAqparat tilshisi.

Jezqazǵanda kerýen eki kúnge kidiredi – 11 jáne 12 mamyr. Buǵan deıin ol Qorǵaljyn, Kókshetaý, Beskól, Stepnogorsk, Rıdder, Semeı, Ekibastuz qalalarynda bolǵan. Kelesi baǵyttar – Abaı jáne Temirtaý qalalary.

Aqparattyq-aǵartýshylyq kerýenniń jumysyn Ulttyq delfıı komıteti Qazaqstandaǵy AQSh elshiliginiń qoldaýymen uıymdastyrdy.

«Jezqazǵan – segizinshi aıaldama. Baǵdarlamada «Ónertapqysh áıelder», «Qaz! Topyraq qupııalary» taqyryptyq kórmeler qarastyrylǵan. Sondaı-aq oqýshylardy beıneleý jáne sándik-qoldanbaly óner boıynsha sheberlik sabaqtaryna shaqyramyz», – deıdi uıymdastyrýshylar.

12 mamyrda jezqazǵandyqtar amerıkalyq zamanaýı ónerdiń jyljymaly kórmesimen tanysyp, sporttyq jarystarǵa jáne ashyq dáristerge qatysty.

Jobanyń basty ıdeıasy – qazaqstandyqtarǵa Qazaqstan men AQSh halyqtarynyń mádenıeti qanshalyqty biregeı ekenin kórsetý, birtutas jalpyadamzattyq qundylyqtardy pash etý.

«Biz muny praktıkalyq turǵyda salt-dástúrlerdi, ádet-ǵuryptardy jáne basqa da mádenı qubylystardy kórsetý arqyly jasaımyz. Mysaly, beıneleý jáne sándik-qoldanbaly óner boıynsha sheberlik sabaqtarynda qatysýshylar eki halyqtyń tumarymen – uıqy aýlaýshymen tanysady. Sheberlerdiń kómegimen olardy ózderi jasaı alady. Úndisterdiń qalamy men qazaq úkileriniń nyshandary túrli kórkemdik tehnıkada zerttelýde. Sonymen qatar ashyq dáriste jergilikti shyǵarmashylyq ujymdarmen birlesip halyqtardyń mádenı kodtary týraly kontsert jáne basqa da is-sharalar ótkizemiz», - dedi joba jetekshisi, Ulttyq delfıı komıtetiniń dırektory Quralaı Túspekova.