Meıirimdi Astana: Elordalyqtar boranda bir-birine qalaı kómektesti
ASTANA. QazAqparat - Beısenbi kúni aq tútek boran astanalyqtardy ábigerge túsirdi. Qalada tabıǵı sıpattaǵy tótenshe jaǵdaı jarııalandy. Qala ákimi Áset Isekeshev astanalyqtar men qala qonaqtaryna úıden shyqpaýǵa keńes berdi. QazAqparat boran qursaýynda qalǵan turǵyndarǵa qol ushyn sozǵan astanalyqtardyń júrek jylytar amaldary týraly aıtýdy jón kórdi.
Boran kúsheıgen sátte áleýmettik jeli men BAQ-ta mektepke shyqqan balanyń joǵalyp ketkeni týraly aqparat tarady. Keıinirek, Astanadaǵy №78 orta mekteptiń ekinshi synyp oqýshysy Rýslandy «KamAZ» júrgizýshisi Marat Kóbesovtyń úıine alyp ketkeni belgili boldy.
QazAqparat tilshisi Marat Kóbesovpen habarlasyp, oqıǵanyń mán-jaıyn surastyrdy:
«Keshe shamamen tańǵy 5:30-da túngi aýysymnan kele jatqanda, qar qursaýynda qaldym. Jolym bolyp, qar tazalaýshy keldi jáne «KamAZ»-dy áýpirimdep shyǵardyq. Sol sátte kóshede jylap kele jatqan balany kórdim. Shamamen alty jarymnyń kezi. Qaıda bara jatqanyn suradym. «Mektepke» dep jaýap berdi. Mektebine aparsam, jabyq. Sodan keıin úıge ákelip, ystyq sháı berdim», - deıdi júrgizýshi.
Marat Kóbesov tańǵy 7:30-da balany mektepke aparǵysy kelgen, biraq boran bastalyp ketken. Ata-anasyna habarlasaıyn dese, balanyń uıaly telefony bolmaǵan.
«Balany úıine aparyp tastaımyn dep ýáde berdim, biraq kezekshilikten keıin kózim ilinip ketti. 1-2 saǵattan soń, tisim aýyryp, dárihanaǵa shyqtym. Sonda aldymnan shyqqan áıel №78 mektepke baratyn joldy surady. Joǵalyp ketken balany izdep júrgenin aıtty. Men mán-jaıdy túsindirip, áıeldi úıge ákeldim. Keıinirek áleýmettik jeliden ata-anasynyń nómirin izdep taptyq», - deıdi Marat Kóbesov.
Boran saldarynan elordada túrli jazataıym oqıǵalar tirkeldi. Sol sebepti, Saryarqa aýdanynyń ákimi Arman Turlybek áleýmettik jelide turǵyndardy bir-birine kómektesýge shaqyrdy.
«Qurmetti turǵyndar! Qolaısyz aýa raıy kezinde bir-birimizge qaıyrymdy bolaıyq, kómekteseıik. Aq tútek borannan jolda júre almaı turǵandardy, mashınasy omby qarǵa batyp qalǵandardy kórseńizder toqtap, kómektesińizder, keń peıil bolaıyq», - dep jazdy ol Facebook-tegi eki qyzdy boran ushyryp kete jazdaǵan sáttiń vıdeosyna pikir bildirip.
«Ábden ashýǵa býlyǵyp otyrmyn. Eki er adam mashınada vıdeoǵa túsirip otyr, shyǵyp kómek berýdi tipti oıyna da almaıdy. Erinbegender vıdeoǵa án jazǵanyn qarańyzdarshy», - dedi Arman Turlybek.
Kúni boıy áleýmettik jeli qoldanýshylary jolda qıyn jaǵdaıǵa tap bolǵandar týraly habarlap otyrdy. Atap aıtqanda, 20 uıymnan quralǵan avtojúrgizýshiler klýbtarynyń alıansy áleýmettik belsendilik tanytty. Astanalyq Jambyl Suraǵanov Facebook-tegi óz paraqshasynda Alıans músheleriniń 16 kólikti jáne 26 adamdy qar qursaýynan shyǵarǵanyn jazdy.
«QR TJ Komıteti men polıtsııa kúsheıtilgen rejimde jumys istedi. Biraq, keı jerde úlgermeı qalýy da múmkin. Bul jaǵdaıda biz kómekke kelemiz. Trassaǵa shyǵyp, kómekke muqtaj jandardyń bar-joǵyn tekseremiz. Keshe kóligin jol boıyna tastap, qalaǵa jaıaý júrip ketken adamdardy kóp keziktirdik. Olardy jylytyp, ystyq sháı berdik jáne úılerine deıin jetkizip saldyq», - dep jaýap berdi Jambyl Suraǵanov QazAqparat tilshisine.
Ózge klýbtar men qala turǵyndary borandy kúni óz kómekterin usyndy. Tipti, qardan shyǵa almaǵan jandarǵa kómektesý úshin Kókshetaýdan kelip jetkender de bar.
Atap óterligi, aýa raıynyń qolaısyzdyǵyna qaramastan, beısenbi kúni Astanada órt sóndirýshiler, polıtsııa, jedel járdem, TJ departamenti qyzmetkerleri, medıtsınalyq mekemeler jáne kommýnaldyq qyzmet óz jumystaryn jalǵastyrdy. Astanalyq polıtsııa Qaraǵandy tasjolynan Qabanbaı batyr dańǵylyna deıingi aınalma jolda 50 avtokólikti qardan shyǵardy.
Juma kúni Astananyń aýa raıy jaqsardy jáne tabıǵı sıpattaǵy tótenshe jaǵdaı alyndy.
