Meıirbıke qyzmetin esh robot almastyra almaıdy - Elordalyq mamanmen suhbat
Gúljaýhar Semserhan 2011 jyly Astana qalalyq medıtsına kolledjin bitirgen. 2014 jyldan beri elordada burynǵy Onkologııa ortalyǵy, qazirgi «Kópsalaly medıtsına ortalyǵynyń» operatsııa bólimshesinde meıirbıke bolyp qyzmet etedi. Qazir koronavırýs epıdemııasyna baılanysty Nur-Sultan qalasy ákimdiginiń kópsalaly medıtsına ortalyǵynyń juqpaly aýrýlarǵa arnalǵan ızolıatorynda jumys istep jatyr.
«Úsh aıdan beri osy ortalyqta koronavırýs ınfektsııasyn juqtyrǵan naýqastardy emdep jatyrmyz. Árıne, bastapqyda ózimizde de qorqynysh boldy. Naýqastar da, mamandar da bul keselmen alǵash ret betpe-bet keldik. Birinshi aýysymdaǵy jumysymyz tańǵy 8-de bastalady. Keshki altyǵa deıin 5 ret naýqastardyń dene qyzýyn ólsheımiz, taǵaıyndalǵan dárilerdi taratyp, ıne egemiz, tamyrǵa dári jiberemiz. Tańerteń jáne keshke naýqastardy rentgenge jáne kompıýterlik tomografııaǵa ázirlep, analızge synama alamyz. Ekinshi aýysymǵa kelgen meıirgerler osylaı tańǵa deıin kezekshilik etedi», - dep túsindirdi meıirbıke QazAqparat tilshisine bergen suhbatynda.
Vırýs juqtyrý qaýpi joǵary topta jumys istegeni úshin meıirbıkege aı saıyn 850 myń teńge ústemeaqy tólenip jatyr.
«Bul jerde memlekettiń medıtsına mamandaryna qoldaý kórsetkeni úshin rahmet aıtqym keledi. Sáýirden bastap elordadaǵy «Hılton» qonaqúıinde turyp jatyrmyz. Biz naýqastarmen baılanysqan adamdar sanalamyz, sondyqtan otbasymyzǵa emes, qonaqúıge toqtadyq. Munda da óz bólmemizden basqa jaqqa, basqa qabatqa barýǵa bolmaıdy. Tamaqty da bir rettik ydyspen, bir rettik staqanmen beredi. Munyń barlyǵy qaýipsizdik sharalaryn saqtaý úshin jasalýda», - deıdi G. Semserhan.
Onyń aıtýynsha, halyqaralyq meıirbıkeler kúnin ár medıtsınalyq mekeme nazardan tys qaldyrmaýǵa tyrysady. Mekeme, basshylyq tarapynan eńbegimen elengen meıirbıkelerge quttyqtaý men marapat qaǵazdary beriledi.
«Qazaqstanda meıirbıkeler óte tapshy, qoǵamda bul mamandardy jaqsy qadirleıdi. Elimizde meıirbıkelerdi bakalavr, magıstratýra, doktorantýra dárejesinde oqytýdyń ózi - bizge berilgen úlken qurmet dep oılaımyn. Sońǵy 3-4 jylda medıtsınalyq kolledjder Joǵarǵy medıtsınalyq kolledjder dep atalyp, Nazarbaev ýnıversıteti men Medıtsınalyq akademııada joǵarǵy bakalavr dárejesinde dıplom berý úrdisi bastaldy. Álemniń damyǵan elderindegi bul tájirıbe Qazaqstanǵa da keldi. Buǵan deıin meıirbıkeler mansaby aǵa meıirbıke nemese bas meıirbıke dárejesimen shekteletin edi. Al qazir odan da joǵarǵy ǵylymı dárejelerdi ala alady», - deıdi maman.
Sonymen birge, Gúljaýhar meıirbıkelik qyzmettiń basty artyqshylyqtaryn aıtyp berdi.
«Qazir birqatar mamandyq jańa tehnologııalarǵa tótep bere almaı, joǵalýdyń aldynda tur. Al meıirbıke qyzmetin eshqandaı tehnıka, esh robot almastyra almaıdy, jyldar boıy zaman talabymen jańaratyn ómirsheń, ózekti mamandyq bolyp qala beredi. Onyń artyqshylyǵy - birden-bir suranysqa ıe mamandyq bolýynda. ıAǵnı, kez kelgen eldimekende nemese qalada laıyqty jumys isteýge bolady. Bolashaqta meıirbıkeler shetelde tájirıbe almasý múmkindigi kóbirek berilse eken deımin. Shetelde biliktiligin jetildirip, aýrýhanalarynda tájirıbe almassa dep oılaımyn», - dep pikir bildirdi ol.
Gúljaýhar Semserhan 7 jylǵa jýyq ýaqyt boıy onkologııalyq ortalyqta qyzmet keledi. Ol operatsııalyq bólimde hırýrg assıstenti retinde otaǵa qatysyp, quraldardy, apparattardy daıyndaıdy.
«Onkologııany emdeý isi de úzdiksiz damyp keledi. Buryndary otada úlken tilik kesiletin bolsa, qazir laparoskopııa jolymen jasalady. Kóptegen naýqastar keselge kóńil bólmeı, keshigip keledi. Sol jaǵy qıynǵa soǵady. Osyndaı aýrýlardyń aldyn alý maqsatynda qazir túrli skrırngter uıymdastyrylady. Deni saý adam jylyna bir ret densaýlyǵyn teksertip turý kerek. Onyń ústine, medıtsınalyq saqtandyrý aıasynda tirkelgen emhanada barlyq tekserýler tegin júrgiziledi», - dep keńes berdi meıirbıke.
Sóz sońynda meıirbıke Qazaqstandaǵy barsha áriptesterin búgingi kásibı merekesimen quttyqtady.
«Barsha áriptesterimdi, tótenshe jaǵdaıda qyzmet etip jatqan barlyq mekemelerdi búgingi merekemen quttyqtaımyn! Meıirbıkeniń túp maǵynasy - meıirim bolǵandyqtan, mamannyń boıynda baýyrmaldyq, meıirim, kásipke adaldyq pen janashyrlyq qasıetteri bolýy kerek. Naýqastyń tolyq jazylyp ketýi meıirbıkeniń jumysyna, kútimine tikeleı baılanysty. Meıirbıke men dárigerdi bólip qaraý múmkin emes. Olar birge jumys isteý arqyly ǵana emdeý isinde nátıjege qol jetkizedi. Barsha qazaqstandyqtarǵa jáne memleket tarapynan berilip jatqan kómekke alǵys bildiremin», - deıdi Gúljaýhar Semserhan.
Aıta keteıik, halyqaralyq medbıkeler kúni Qyrym soǵysynda (1853-1856) sanıtarlar jasaǵyn uıymdastyryp, olarǵa basshylyq etken aǵylshyn medbıkesi - Florens Naıtıngeıldiń týǵan kúninde - 12 mamyrda jyl saıyn toılanady. Ár eki jyl saıyn Halyqaralyq Qyzyl Krest jáne Qyzyl Jarty Aı qozǵalysy eń úzdik 50 medbıkege Florens Naıtıngeıl atyndaǵy medaldi tabystaıdy.