Mettıý Seıgers: Qazaqstan aldaǵy 20 jylda ózin jaqsy jaǵynan kórsetedi dep oılaımyn

ASTANA. KAZINFORM — S&P Global kompanııasynyń energetıka jónindegi orynbasary Mettıý Seıgers Astana halyqaralyq forýmynda Qazaqstan ekonomıkasynyń ártaraptaný qarqyny týraly pikir bildirdi.

— Qazaqstanda ne bolyp jatqanyn kórip otyrmyz. Qazaqstan qazir baǵytyn ózgerte bastady. Bul el burynǵydan áldeqaıda tereń óńdeý ónerkásibine kúsh salyp jatyr. Bul elde bári qosylǵan qun tizbegi, munaı-gaz ekonomıkasy, ártaraptaný sııaqty máselelerdi aıtyp júr. Qazaqstan keıingi 30 jylda ózin óte jaqsy ustady dep oılaımyn, — dedi ol.

Sondaı-aq, Qazaqstannyń adamı kapıtalyna da joǵary baǵa berdi.

— Qazaqstan aldaǵy 20 jylda da ózin jaqsy jaǵynan kórsetedi dep oılaımyn. Halyqtyń sany bar, bilim men ıntellektýaldyq kapıtal bar. Bul 30 jyl burynǵy Qazaqstan emes. Odan beri úlken qozǵalystar boldy. 30 jyl ishinde qol jetkizgen transformatsııamen quttyqtaǵym da keledi, — dedi Mettıý Seıgers.

Aıta keteıik, elordada Astana halyqaralyq forýmy ótip jatyr. Buǵan deıin Energetıka mınıstriniń orynbasary Álibek Jamaýov Astana halyqaralyq forýmynda Qazaqstannyń energetıka salasyndaǵy saıasaty týraly málimet berdi.