Metsera kompanııasyn satyp alǵan Pfizer semizdikke qarsy jańa dárilerdi damytpaq

ASTANA. KAZINFORM –  Pfizer semizdikke qarsy dári-dármek óndirýshi Metsera kompanııasyn 7,3 mlrd dollarǵa satyp almaq, dep habarlaıdy AZƏRTAC.

Pfizer dúısenbi kúni salmaqty azaıtýǵa arnalǵan dárilerdi ázirleýshi Metsera kompanııasyn satyp alý týraly, quny 7,3 mlrd dollarǵa deıin jetetin kelisim jasaǵanyn málimdedi. Bul qadam kompanııaǵa semizdikti emdeýdiń tabysty naryǵynda óz ornyn nyǵaıtýǵa múmkindik bermek.

Álemdik semizdikke qarsy dáriler naryǵy sońǵy jyldary qarqyndy ósip keledi. Sarapshylardyń boljamynsha, 2030 jyldardyń basyna qaraı onyń kólemi 150 mlrd dollarǵa jetýi múmkin. Buǵan Novo Nordisk jáne Eli Lilly sııaqty kompanııalardyń joǵary tıimdi GLP-1 preparattarynyń jetistigi yqpal etti.

Farmatsevtıkalyq kompanııalar sondaı-aq semizdikti emdeýdiń jańa býyn tásilderin ázirleýge tyrysyp jatyr. Olardyń qatarynda basqa gormondarǵa áser etetin jáne maıdy ketirý barysynda bulshyq etti saqtaýǵa kómektesetin dáriler bar, dep jazady Reuters agenttigi.

Pfizer bas dırektory Albert Býrla Metsera kompanııasyn satyp alý «Pfizer-di osy negizgi terapııalyq deńgeıge shyǵarady» dep atap ótti. Sondaı-aq ol kompanııanyń kardıometabolızm salasyndaǵy tájirıbesi men jahandyq ınfraqurylymyn jańa býyn semizdikke qarsy dárilerdi ázirleýdi jedeldetý úshin qoldanýǵa múmkindik beretinin aıtty.

Bul mámile Pfizer-diń salmaq azaıtýǵa arnalǵan óziniń dárisin – danýglıprondy ázirleýdegi sátsizdikterinen keıin jasaldy.

Sáýir aıynda kompanııa táýligine bir ret qabyldanatyn danýglıpron nusqasyn zertteýdi toqtatty, sebebi synaqqa qatysqan bir patsıentte yqtımal dárilik baýyr zaqymdanýy anyqtaldy. Preparatty qabyldaýdy toqtatqannan keıin jaǵdaıy túzeldi. Al táýligine eki ret qabyldanatyn nusqasyn ázirleý 2023 jyldyń sońynda ártúrli janama áserlerge baılanysty toqtatylǵan bolatyn. 

Aıta ketelik Almatyda bıýdjet esebinen alynatyn dári-dármek tizimi keńeıtildi.