Metrologııa týraly zańnyń 16-shy baby oryndalmaı otyr
ASTANA. 25 jeltoqsan. QazAqparat - Metrologııa týraly zańnyń 16-shy baby oryndalmaı otyr. Bul týraly búgin tehnıkalyq retteý jáne metrologııa júıesin damytý sharalaryna arnalǵan keńeste QR Indýstrııa jáne jańa tehnologııalar mınıstrligi Tehnıkalyq retteý jáne metrologııa komıtetiniń tóraǵasy Birjan Qanyshev málim etti.
«Bizde metrologııa týraly jaqsy zań bar. Degenmen osy zańnyń 16-shy baby salalyq memlekettik organdarda, ulttyq kompanııalarda jáne iri óndiristerde, metrologııalyq qyzmettiń bolýyn talap etedi. Bul bap oryndalmaı otyr. Sonyń saldarynan kadr jetispeýde»,-dep atap ótti ol.
Osy oraıda QR Premer-Mınıstri Serik Ahmetov zań normasy talabynyń oryndalmaýyna keıistik tanytty.
«Demek, zań normasy túsiniksiz jasalǵan. Zańnyń bul normasyn oryndamaǵany úshin jaýapkershilik joq. ıAǵnı, sizder zańdy durys jazbaısyzdar. Jaýapkershilikti kórsetpeısizder. Jumysty kúsheıtińizder. Nesine shaǵymdanasyz. Normatıvtik-quqyqtyq akti ázirlep, baqylaýdy qatańdatyńyzdar. QR zańnamasy saqtalmaǵany úshin BAQ-tardy, prokýratýrany aralastyryńyzdar»,-dedi S. Ahmetov.
Sondaı-aq, Premer-Mınıstr mınıstrlikter men vedomstvolar kez kelgen problemany sheshý úshin úkimettik nemese prezıdenttik deńgeıge kóterýdi ádetke aınaldyryp otyrǵandyǵyn basa aıtty.
