Metrodaǵy qaıǵyly jaǵdaı: beketterde qorshaý ornatyla bastady

ALMATY. KAZINFORM – Almaty metrosynyń beketterinde qaýipsizdik qorshaýlary ornatyla bastady.

Áleýmettik jelide metro beketterde qorshaýlardyń ornatyla bastaǵany týraly beınejazba tarady. Almaty metropolıtetiniń baspasóz qyzmeti agenttik saýalyna bul qorshaýlar qaýipsizdik úshin qoıylyp jatqanyn habarlady.

- Metro stantsııalarynda jolaýshylardyń qaýipsizdigin qamtamasyz etý maqsatynda qorshaýlar ornatý jumystary bastaldy. Jumys reglamentine sáıkes, aldymen berik metaldan jasalǵan tirekter ornatylady, keıinnen olarǵa myqty shynydan jasalǵan bólgishter bekitiledi. Jumystardy tolyq aıaqtaý aldaǵy apta ishinde josparlanyp otyr, - dep málimdedi metropolıten.

Eske salaıyq, 10 jeltoqsan kúni Almaty metrosynda 26 jastaǵy zaǵıp jolaýshy relske qulap, mert boldy. 

Keıin qaıǵyly oqıǵanyń beınejazbasy jelide tarady. Onda 26 jastaǵy jigittiń vagondar arasyndaǵy ashyq tustan relske qulap ketkenin kórýge bolady.

Almaty ákimi Erbolat Dosaev qaıǵyly jaǵdaıdan keıin Almaty metrosynda ne ózgergenin aıtqan edi.