Metroda ornatylyp jatqan qaýipsizdik qorshaýlary ýaqytsha sheshim — metropolıten dırektory

ALMATY. KAZINFORM — Avtomattandyrylǵan platformalyq qorshaýlardy ornatý uzaq ýaqytty qajet etedi, óıtkeni ol úshin jobalaý, tehnıkalyq-ekonomıkalyq negizdeme, qarjylandyrý, sondaı-aq memlekettik satyp alý rásimderin ótkizý qajet.

Osyǵan baılanysty jolaýshylardyń qaýipsizdigi úshin ýaqytsha metall qorshaýlar ornatylyp jatyr. Bul týraly Almaty metropolıteniniń dırektory Almasbek Orynbekov aıtty.

Almasbek Orynbekovtiń sózinshe, aldymen tot baspaıtyn jyltyr metaldan jasalǵan tirekter ornatylady, keıin olarǵa soqqyǵa tózimdi shynydan jasalǵan qorshaýlar bekitiledi. Bul jumystar jaqynda aıaqtalady dep josparlanyp otyr.

— Avtomattandyrylǵan platformalyq qorshaýlardy ornatý uzaq ýaqytty qajet etedi, óıtkeni ol úshin jobalaý, tehnıkalyq-ekonomıkalyq negizdeme, qarjylandyrý, sondaı-aq memlekettik satyp alý rásimderin ótkizý qajet. Osyǵan baılanysty jolaýshylardyń qaýipsizdigi úshin ýaqytsha metall qorshaýlar ornatylyp jatyr, — dedi Almasbek Orynbekov.

Aıtýynsha, qorshaýlar vagondardyń arasyndaǵy keńistikti shekteý úshin ornatylady jáne metropolıtenniń paıdalaný shyǵyny esebinen júzege asyrylady, ıaǵnı bıýdjet qarajaty tartylmaıdy.

Osyǵan deıin Almaty metrosynyń beketterinde qaýipsizdik qorshaýlary ornatyla bastaǵany týraly jazǵan bolatynbyz. 

Eske salaıyq, 10 jeltoqsan kúni Almaty metrosynda 26 jastaǵy zaǵıp jolaýshy relske qulap, mert boldy. 

Keıin qaıǵyly oqıǵanyń beınejazbasy jelide tarady. Onda 26 jastaǵy jigittiń vagondar arasyndaǵy ashyq tustan relske qulap ketkenin kórýge bolady. 

Almaty ákimi Erbolat Dosaev qaıǵyly jaǵdaıdan keıin Almaty metrosynda ne ózgergenin aıtqan edi.