Metro qurylysyna bólingen qarajatty jymqyrǵan: 127 mln teńge memleketke qaıtaryldy
ASTANA. KAZINFORM — «Metropolıten» KMK-nyń laýazymdy tulǵalary merdiger uıymdardyń basshylary jáne qyzmetkerlerimen aldyn ala sóz baılasý arqyly Almaty qalasynda metropolıtendi salý jáne jabdyqtaýǵa bólingen bıýdjet qarajatyn asa iri mólsherde jymqyrý shemasyn uıymdastyrǵan. Bul týraly Bas prokýratýra málim etti.
Almaly aýdandyq sotynyń úkimimen «Metropolıten» KMK-nyń jáne merdiger uıymnyń 10 laýazymdy tulǵasy múlkin tárkileýmen uzaq merzimge bas bostandyǵynan aıyrýǵa, jáne keltirilgen zalaldy ortaq tártippen óndirýge sottalǵan.
— Kassatsııalyq tártippen sot aktisiniń zańdylyǵy tekserý barysynda jymqyrylǵan qarajattyń 127 mln teńge somasy basqa zańdy tulǵanyń bank shottarynan anyqtaldy. Prokýrordyń kassatsııalyq narazylyǵy boıynsha sot aktileri ózgertilip, kórsetilgen qarajat memleket kirisine óndirildi, — delingen habarlamada.
Atalǵan fakt memlekettik qarjyǵa qol suǵýshylyq úshin jaýapkershiliktiń bultartpastyǵyn aıqyn kórsetedi jáne bıýdjet qarajatyn paıdalaný kezinde laýazymdy tulǵalar men ózgede qatysýshylardyń joǵary deńgeıdegi adaldyqty, zańdylyqty jáne jeke jaýapkershilikti saqtaýǵa mindetti ekenin aıqyndaıdy, óıtkeni bul saladaǵy kez kelgen zań buzýshylyqtar memleket tarapynan erekshe baqylaýda bolady jáne qatań quqyqtyq saldarǵa ákeledi.
Eske sala keteıik, buǵan deıin Abaı oblysynda mektep býhgalteri 18 mln teńgeden astam qarjy jymqyrǵan bolatyn.
