METRO Qazaqstan naryǵynan ketedi: dúkender men dámhanalarǵa áseri qandaı
ASTANA. KAZINFORM — Germanııanyń METRO kóterme saýda jelisi Qazaqstan naryǵynan ketip jatyr, alaıda taýar jetkizýge degen suranys joǵalmaıdy. Bul jaǵdaı shaǵyn dúkenderge, dámhanalar men meıramhanalarǵa qalaı áser etetinin «Atameken» UKP Saýda departamentiniń basqarýshy dırektory Dáýren Aýtálipov Kazinform agenttiginiń tilshisine aıtyp berdi
Onyń sózinshe, METRO-nyń bul sheshimine kompanııanyń bıznes-modeli men Qazaqstan naryǵynyń erekshelikteri turǵysynan qaraý qajet.
— METRO-nyń Qazaqstannan ketýi eldegi saýda-sattyq kóleminiń tarylyp jatqanyn nemese ınvestıtsııalyq tartymdylyqtyń tómendegenin bildirmeıdi. Mundaı qorytyndy jasaý úshin, birinshiden, tereńirek taldaý qajet. Ekinshiden, kompanııanyń bul sheshimi týraly aqparat taraǵanyna kóp bolǵan joq, — dedi sarapshy.
Ol Eýropa men Qazaqstandaǵy kóterme saýda naryqtarynyń arasynda aıtarlyqtaı aıyrmashylyq bar ekenin atap ótti.
— Ózderińiz biletindeı, METRO-nyń bıznes-modeli — B2B klıentterge baǵyttalǵan klassıkalyq cash & carry júıesi. Bul — iri kólemdegi taýar jetkizýge, satylym kóleminiń kóp bolýyna baılanysty baǵany salystyrmaly túrde tómen ustaýǵa jáne qosymsha qyzmetterdi barynsha azaıtýǵa negizdelgen model. Alaıda Qazaqstanda dál osy klassıkalyq bıznes-modeldi ustaný onsha tıimdi emes, — dep túsindirdi Dáýren Aýtálipov.
Onyń aıtýynsha, buǵan Qazaqstan aýmaǵynyń úlkendigi jáne suranystyń birkelki bolmaýy áser etýi múmkin. Sonymen qatar B2B klıentterdiń basym bóligi iri qalalarda shoǵyrlanǵan.
— METRO-nyń Qazaqstannyń ár óńirinde alty iri saýda núktesi bar. Bul rette bizdiń elimiz — aýmaǵy boıynsha álemdegi eń iri elderdiń biri, al B2B klıenttik bazasy birkelki bólinbegen. Osy jaǵdaılardyń barlyǵy kompanııanyń qoldanystaǵy bıznes-modelin burynǵydaı ustanýdy tıimsiz etedi, — deıdi sarapshy.
Budan bólek, Qazaqstandaǵy saýda naryǵy da qarqyndy ózgerip keledi. Básekelester saýda dúkenderimen qatar, onlaın tapsyrys qabyldaý jáne jedel jetkizý qyzmetterin qamtıtyn kópformatty modelderdi damytyp jatyr.
METRO-dan taýar satyp alyp kelgen shaǵyn dúkender, dámhanalar, meıramhanalar jáne basqa da kásip ıelerin ne kútip turǵany týraly suraqqa jaýap bergen Dáýren Aýtálipov kóterme taýar jetkizýge degen suranys joǵalmaıtynyn atap ótti.
— Saýda mınıstrliginiń málimetterine súıensek, elimizdegi saýda kólemi artyp keledi. Suranys bar bolǵandyqtan, belgili bir saýda jelisiniń naryqtan shyǵýy oǵan áser etpeıdi. Qajettilik saqtalady, tek klıentter ózge saýda jelilerine aýysady, — deıdi Dáýren Aýtálipov.
Sarapshynyń pikirinshe, METRO-nyń naryqtan shyǵýy baǵanyń birden ósýine sebep bola qoımaıdy.
— Bir oıynshynyń naryqtan shyǵýy baǵanyń ósýine tikeleı sebep bolmaıdy. Sondyqtan bul jaǵdaı baǵaǵa áser etpeıdi, — dep túıindedi ol.
Aıta keteıik, 3 qazanda halyqaralyq kóterme saýda kompanııasy METRO AG Qazaqstandaǵy jumysyn 2027 jyldyń naýryz aıynyń sońyna qaraı toqtatatynyn málimdedi. Kompanııanyń barlyq alty dúkeni men taýar jetkizý qyzmeti kezeń-kezeńimen jabylady. METRO bul sheshimin bıznestiń odan ári turaqty ósýine qajetti negiz qalyptastyrý qıyn bolǵanymen túsindirdi.
METRO Qazaqstandaǵy alǵashqy dúkenin 2009 jylǵy qazanda ashty. Sodan beri kompanııanyń eldegi bólimshesi qoǵamdyq tamaqtaný oryndary men saýda kásiporyndaryna kóterme taýar jetkizýge mamandandy. Sońǵy jyldary METRO taýarlardy jetkizý qyzmetin de damyta tústi.
