Meteorologtar: Japonııada úsh kúnde 388 jer silkinisi boldy
ASTANA. QazAqparat - Ońtústik-batystaǵy japonııalyq Kıýsıý aralynda sońǵy úsh kúnde 388 jer silkinisi boldy, dep habarlady TASS eldiń ulttyq meteorologııalyq basqarmasyna silteme jasap.
Sońǵy málimetter boıynsha, apat saldarynan 41 adam ajal qushty. 2 myńnan astam adam túrli jaraqattarmen aýrýhanalarda jatyr.
Ótken túnde Kýmamoto prefektýrasynda jaýyn qatty jaýyp, jel kúsheıýi saldarynan qutqarý sharalaryn júrgizý qıyn boldy. Ulttyq qorǵanys sarbazdary, polıtsııa jáne órt sóndirý basqarmasynyń qyzmetkerleri úıindilerdiń astynan iz-túzsiz joǵalǵan dep sanalatyndardy izdestirýde. Sharaǵa qatysyp jatqan qutqarýshylardyń sany búgin 30 myńǵa jetýi tıis.
Jergilikti seısmologtar jerasty dúmpýleri eń kemi bir aptadaı bolady dep sanaıdy. Eldiń osy bóliginde qýatty jer silkinisi bolýy múmkindigin eskertti.
Kýmamoto jáne Oıta prefektýralarynyń 240 myńnan astam turǵyny arnaıy ortalyqtarǵa, mektepter men mýnıtsıpaldyq ǵımarattarǵa ornalastyryldy. Kýmamoto prefektýrasynda shamamen 80 myń úı jaryqsyz qaldy.
Foto:© AP Photo/Koji Ueda
