Meteorologtar Qazaqstanda kóktemgi egis naýqany kezinde boljanyp otyrǵan aýa-raıy jaıynda aıtyp berdi
ASTANA. QazAqparat - Búgin Ortalyq kommýnıkatsııalar qyzmetindegi baspasóz máslıhatynda «Qazgıdromet» ókili Erbolat Muqanov kóktemgi egis naýqany kezindegi qandaı aýa-raıy boljanyp turǵandyǵy jaıynda aıtyp berdi.
«2015 jyldyń kúzindegi ylǵaldyń qoryna toqtalatyn bolsaq, ylǵaldylyqtyń tómen deńgeıi Batys Qazaqstan, Aqtóbe, Pavlodar, Qaraǵandy oblystarynda baıqaldy, al normadan joǵary kórsetkish Soltústik Qazaqstan men Jambyl oblystarynda boldy. Qalǵan óńirlerde ylǵaldyqtyń qanaǵattanarlyq kólemdegi qory jınaqtaldy»,-dep toqtaldy E. Muqanov.
Onyń sózine qaraǵanda, qys kezinde normaǵa jaqyn jáne odan joǵary deńgeı Aqmola, Aqtóbe, Almaty oblystarynda, sondaı-aq joǵary deńgeı Soltústik Qazaqstan, Qostanaı, Batys Qazaqstan jáne Qaraǵandy oblystarynda qalyptasty.
«Kóktemgi kezeńde ylǵaly qory boıynsha elimizdiń barlyq aýmaǵynda qanaǵattanarlyq jáne ońtaıly mólsher bar»,-dedi ol.
E. Muqanovtyń aıtýynsha, sáýir aıynda Qazaqstannyń negizgi astyq egetin óńirlerinde temperatýra 5 gradýs jylylyqty kórsetedi. Alaıda, jaýyn-shashyn normadan tómen bolmaq.
«Mamyr aıynda aýa temperatýrasy normadan jaǵarylaý bolyp, 15 gradýstan asady jáne jaýyn-shashyn deńgeıden tómen túspek. Osy kezeńde ylǵaldylyq qorymen problema týyndaýy múmkin. Biraq ta, fermerler osy jaǵdaıda qandaı sharalardy qabyldaý kerektigin biledi dep oılaımyn»,-dedi «Qazgıdromet» ókili.
Budan keıin ol maýsym aıyndaǵy jaǵdaıǵa toqtala kele, temperatýra deńgeıi tıisti normada bolatynyn, sonymen qatar jaýyn-shashyn da qajetti deńgeıde boljanyp otyrǵanyn jetkizdi.
Onyń paıymynsha, bıyl sapaly astyq alýǵa jaqsy múmkindikter bar.
