Metallýrgter kásibı merekede Prezıdenttiń marapatyna ıe boldy
ASTANA. KAZINFORM – Premer-mınıstr kásibı merekesine oraı metallýrgterge Prezıdent atynan memlekettik nagradalar tabystady, dep habarlaıdy Úkimettiń baspasóz qyzmeti.
Premer-mınıstr Oljas Bektenov «Metallýrg kúni» kásibı merekesine oraı taý-ken metallýrgııa salasynyń qyzmetkerlerine Prezıdent Qasym-Jomart Toqaevtyń atynan memlekettik nagradalardy tabys etti.
Taý-ken metallýrgııa kesheni — ónerkásipti damytýdyń negizi. Táýelsizdik jyldarynda bul sala turaqty ekonomıkalyq ósimge jáne áleýmettik ál-aýqattyń nyǵaıýyna yqpal etti. 2024 jyldyń qorytyndysy boıynsha el ekonomıkasyna qosqan úlesi 6,9%-dy qurady. Búginde salada 110 myńnan astam adam jumys isteıdi. Olardyń kúndelikti jumysy mashına jasaý, qurylys, munaı-gaz jáne energetıka salasynyń damýyna serpin beredi.
Oljas Bektenov metallýrgııa salasyn damytý Úkimettiń basymdyqtarynyń biri bolyp qala beretinin atap ótti. Óndiristi jańǵyrtý, jańa ken oryndaryn ıgerý jáne zamanaýı tehnologııalardy engizý boıynsha júrgizilip jatqan jumystar jalǵasatyn bolady. Prezıdent jarııalaǵan «Jumysshy mamandyqtar jyly» aıasynda taý-ken metallýrgııa kesheniniń eńbekkerlerine, onyń ishinde metallýrgterge erekshe kóńil bólinedi.
Bıyl Memleket basshysy alǵash ret eki jańa memlekettik nagrada — «Qazaqstannyń eńbek sińirgen kenshisi» jáne «Qazaqstannyń eńbek sińirgen ónerkásip qaıratkeri» qurmetti ataqtaryn taǵaıyndady. Osy jyly barlyǵy taý-ken metallýrgııa ónerkásibiniń 600-ge jýyq jumysshysynyń eńbegi atap ótildi. Olar — búkil el boıynsha óndiris ozattary men eńbek ardagerleri. Memlekettik nagradalardy metallýrgterge ónerkásip jáne qurylys mınıstri, Astana jáne Almaty qalalaryndaǵy, Ulytaý jáne Abaı oblystaryndaǵy, Qaraǵandy, Pavlodar, Shyǵys Qazaqstan, Qyzylorda, Aqtóbe jáne Qostanaı oblystaryndaǵy óńir ákimderi tabys etti. Sala ókilderi Memleket basshysyna eńbekterin joǵary baǵalaǵany úshin alǵys bildirdi.
«Kazakhmys Smelting» JShS Jezqazǵan mys balqytý zaýytynyń balqytýshysy Bolat Aıdabolov bul marapat el ekonomıkasynyń negizi bolyp sanalatyn barlyq salanyń úlesin baǵalaý ekenin atap ótti.
«Qazaqmys korporatsııasy» JShS flotatory Gúlbaný Jumadildına marapat — ujymnyń birlesken jumysynyń nátıjesi ekenin aıtyp, Prezıdentke metallýrgterdiń eńbegine kóńil bólgeni úshin alǵysyn bildirdi.
Budan buryn Prezıdent sý sharýashylyǵyn damytýǵa eleýli úles qosqan bir top azamatty marapattaǵan edi.