Metallýrgııalyq óndiriske JI engizý boıynsha aýqymdy joba bastaldy
ASTANA. KAZINFORM — Elimizde óńdeýshi ónerkásipke jasandy ıntellekt elementterin engizý jónindegi tapsyrma aıasynda jobalardy ázirleý jáne iske asyrý jumystary júrgizilip jatyr. Bul QR Premer-mınıstrdiń birinshi orynbasary Roman Sklıardyń tóraǵalyǵymen ótken keńestiń qorytyndysy, dep habarlaıdy QR Ónerkásip jáne qurylys mınıstrliginiń baspasóz qyzmeti.
Qazir ERG quramyndaǵy «TNK «Qazhrom» AQ – Aqsý ferroqorytpa zaýytynda jasandy ıntellekt quraldaryn qoldanystaǵy balqytý peshin basqarýdyń aqparattyq júıesine biriktirý jobasy bastaldy. Pılottyq rejımdegi bastama №64 ken termııalyq peshtiń negizinde iske asyrylyp jatyr.
Búginde jobanyń birinshi kezeńi aıaqtaldy. Sońǵy úsh aıdyń óndiristik derekteri jınalyp, Big Data taldaýy jasaldy. Sarapshylardyń aıtýynsha, alynǵan málimetter negizinde jasandy ıntellekttiń usynystyq modelin qurýǵa úlken múmkindik bar. Bolashaqta bul tehnologııalyq úderisti turaqtandyrýǵa, ónimdilikti jáne energııa tıimdiligin arttyrýǵa, apattardyń aldyn alýǵa ári shyǵyndardy azaıtýǵa jol ashady.
- Búgingi tańda taý-ken metallýrgııa kesheninde jasandy ıntellekt engizý – jaı ǵana trend emes, bul básekege qabilettilik pen óndiristik qaýipsizdiktiń negizgi sharty. Álemdik jáne qazaqstandyq úzdik tájirıbeler pılottyq jobalardan turaqty óndiristik nátıjege qaraı oıysyp jatyr. Bizdiń qaǵıdamyz qarapaıym, datchık, derek, model, ólshenetin KPI», – atap ótti ERG Ǵylymı-zertteý ınjınırıng ortalyǵynyń jobalyq jetekshisi Rýslan Eskendırov.
Jyl basynda ERG quramynda ǴZIO, BTS (ERG-diń ІT enshiles kompanııasy), «Qazhrom» jáne metallýrgııa departamentiniń mamandarynan quralǵan birlesken komanda jasaqtaldy. Osy ýaqyt ishinde olar qoldanystaǵy júıelerden derekterdi daıyndap, taldap shyqty. Joba seriktes tehnologııalyq kompanııamen birlesip júzege asyrylyp keledi. Ol buǵan deıin sheteldegi ferroqorytpa óndiristerinde osyndaı quraldardy engizgen. Big Data taldaýy kórsetkendeı, qazirgi bar tehnologııalyq derekter jasandy ıntellekt modýlderin qurýǵa jetkilikti.
Tehnologııalyq protsesti basqarý úshin 10 túrli jasandy ıntellekt modýlderin engizý josparlanyp otyr. Máselen, elektrodtardyń synýyn boljaıtyn modýldiń ózi jabdyqtyń bosqa turyp qalýyn aıtarlyqtaı azaıtyp, shyǵyndardy tómendetedi.
Kelesi qadam – №64 peshtiń jumysyn basqarýǵa jáne baqylaýǵa arnalǵan tsıfrlyq modýlder ázirlep, olardy qoldanystaǵy avtomattandyrylǵan basqarý júıesine biriktirý. Negizgi basymdyq – aldyn ala dıagnostıka, ıntellektýaldy rejımderdi ońtaılandyrý, «jumsaq datchıkter» jáne operatorǵa arnalǵan usynystar. Eger joba oń nátıje berse, tájirıbe basqa peshterde de qoldanylmaq.
Aıta keteıik, buǵan deıin Roman Sklıar GFR ekonomıka jáne energetıka mınıstrimen saýda-ekonomıkalyq yntymaqtastyqty keńeıtý máselelerin talqylaǵanyn jazǵan bolatynbyz.