Metallýrgııa salasyndaǵy tuńǵysh qazaqstandyq PhD doktorlary dıplom aldy

Alǵashqy doktorlar Tatıana Chepýshtanova men Janar Jumadilova QazUTÝ men AQSh-tyń Koloradodaǵy Taý-ken joǵary mektebinde qatar bilim alǵan. 10 pándi qazaq, orys, aǵylshyn tilderinde oqyǵan olar dıplomdy da osy tilderde , aldymen mamyr aıynda Almatyda, maýsym aıynda Koloradoda aǵylshyn tilinde qorǵaǵan. Búgingi shara barysynda olarǵa QazUTÝ men Kolorado Taý-ken joǵary mektebiniń dıplomy berildi.

2006 jyly QazUTÝ men Kolorado Taý-ken joǵary mektebi arasynda metallýrgııa salasy boıynsha fılosofııa doktorlaryn tájirıbelik baǵdarlama negizinde daıyndaý týraly kelisim jasalǵan. 2008 jyly QazUTÝ rektory Jeksenbek Ádilov pen Kolorado Taý-ken joǵary mektebiniń prezıdenti professor Skoggınstiń Amerıkanyń Goldoen qalasyndaǵy kezdesýi nátıjesinde alǵashqy doktorlar daıyndala bastaǵan. Tatıana Chepýshtanova men Janar Jumadilova osy baǵdarlamanyń alǵashqy qarlyǵashtary bolyp otyr. QazUTÝ-dyń metallýrgııa ınstýtýy dırektorynyń aıtýynsha, qazirgi tańda bul mamandyq boıynsha taǵy 2 PhD doktory men 9 magıstr bilim alýda. "Osydan 3 jyl buryn QazUTÝ-da 3 satyly bilim berý engizilgen edi. Nátıjesinde búgin metallýrgııa salasy boıynsha eń alǵashqy túlekter dıplom aldy. Bul bizdiń bilim salasynyń, Qazaqstan ekonomıkasynyń damýyna, damyǵan elý eldiń qataryna kirýge qosqan alǵashqy úlesimiz" -deıdi ınstıtýt basshysy.