Metallýrgııa Qazaqstandaǵy óńdeý ónerkásibi kóleminiń 40%-dan astamyn qamtıdy

ASTANA. KAZINFORM — Metallýrgııa 40,1% úlespen Qazaqstannyń óńdeý ónerkásibindegi negizgi draıverge aınalyp otyr.

Birinshi jartyjyldyq qorytyndysy men salanyń odan arǵy ósý perspektıvasy 17 shildede vıtse-premer - ulttyq ekonomıka mınıstri Serik Jumanǵarınniń tóraǵalyǵymen ótken Ekonomıkalyq ósýdi qamtamasyz etý jónindegi shtab otyrysynda talqylandy.

Metallýrgııada joǵary ósý qarqynyn saqtaý ońaı mindet emes: 2024 jyly sala sońǵy 10 jyldaǵy rekordtyq 6,9% ósimge qol jetkizdi. Búgingi tańda kásiporyndardyń óndiristik qýaty 90-100% júktememen jumys istep tur. Bul óndiris kólemin odan ári ulǵaıtý múmkindigin shekteýde.

Byltyrǵy joǵary bazaǵa qaramastan, 2025 jylǵy birinshi jartyjyldyq qorytyndysy boıynsha, metallýrgııa ónerkásibindegi naqty kólem ındeksi 0,1%-ǵa ósti. Salanyń ósý qarqynyn arttyrý úshin arnaıy jol kartasy ázirlenip, iske asyrylýda. Ónerkásip jáne qurylys vıtse-mınıstri Oljas Saparbekovtyń aıtýynsha, qujattaǵy birqatar aralyq maqsatqa qol jetkizilgen.

Atap aıtqanda, «Jomart» kenishinde qalpyna keltirý jumysy aıaqtalyp, Aqtóbe mys kompanııasynan «Qaztsınk» kásiporyndaryna myrysh kontsentratyn jetkizý kólemi ulǵaıdy. KAZ Minerals toby otandyq zaýyttarǵa mys kontsentratynyń iri partııasyn jóneltti. Bul jyl sońyna deıin ony el ishinde qaıta óńdeý kólemin edáýir arttyrýǵa múmkindik beredi. Serik Jumanǵarın salalyq mınıstrlikke negizgi metallýrgııalyq kásiporyndar ornalasqan óńirlerdiń ákimdigimen birlesip, ornyqty ekonomıkalyq ósýdi qamtamasyz etý úshin óndiris basshylarymen problemalyq máselelerdi jedel pysyqtaýdy tapsyrdy.

Aıta keteıik, ulytaýlyq metallýrgter Memleket basshysynyń atynan marapattaldy.