Metallýrgııa, IT, avtomattandyrý: Jezqazǵan polıtehnıkalyq kolledji qandaı mamandyqtarǵa basymdyq beredi
JEZQAZǴAN. KAZINFORM — Jumysshy mamandyqtar jyly aıasynda eldiń óndiristik ortalyǵy — Jezqazǵan qalasynda óńirdiń eń kóne tehnıkalyq oqý oryndarynyń biri Jezqazǵan joǵary polıtehnıkalyq kolledjine arnalǵan baspasóz týry ótti.
Іs-sharanyń maqsaty — tehnıkalyq jáne kásiptik bilim berýdiń jastarǵa tabysty mansapqa jol ashatynyn kórsetý. 72 jyldyq tarıhy bar bul bilim ordasy — Ulytaý óńiriniń negizgi kadr daıarlaý ortalyǵy. Munda stýdentter tek jumysshy mamandyǵyn meńgerip qana qoımaı, zamanaýı óndiristik tájirıbe alyp, eńbek naryǵynda suranysqa ıe maman bolyp shyǵady.
Kolledj mıssııasy — bilim berý, zertteý jáne ınnovatsııalyq ortany qalyptastyra otyryp, halyqaralyq standarttarǵa saı sapaly kásiptik oqytýdy qamtamasyz etý.
Baspasóz týry aıasynda qatysýshylar kolledjdiń 3 korpýsyn, 32 oryndyq jataqhanasyn, sport keshenin, ashanasyn jáne «Building & Energy» quzyrettilik ortalyǵyn aralady. «Jas maman» jobasy aıasynda jabdyqtalǵan dánekerleý, slesarlyq, elektrmontaj, sándik sylaq, aǵash óńdeý jáne ózge de sheberhanalar jumysymen tanysyp, «Qazaqmys» korporatsııasynyń óndiristik alańynda dýaldi oqytý protsesin kórdi. Kolledjdiń tabysty túlekterimen júzdesti.
Kolledjde metallýrgııa, baıytý, IT, avtomattandyrý, qutqarý isi, energetıka jáne qurylys baǵyttary boıynsha 11 ózekti mamandyq oqytylady. 23 oqý kabıneti, 12 zerthana, 8 sheberhana zamanaýı talaptarǵa saı jabdyqtalǵan. 61 bilikti oqytýshynyń 19-y WorldSkills standarttary boıynsha daıarlyqtan ótken. 2024–2025 oqý jylynda kolledj bazasynda ótken «WorldSkills Ulytau 2025» chempıonatynda stýdentter birneshe quzyrettilik boıynsha júldeli oryndarǵa ıe boldy. Dýaldi oqytý jáne óndiristik tájirıbe «Qazaqmys», Kazakhmys Energy jáne óńirdiń 15-ten astam kásipornynda júzege asyrylady. Oqytýshylar Skills Enbek platformasynda suranysqa ıe daǵdylardy úıretetin avtorlyq onlaın kýrstar ázirleýdi qolǵa alǵan.
Kásiptik baǵdar men mansaptyq qoldaý:
Kolledj «Mansap kompasy» platformasy arqyly kásibı baǵdar berip, «Ashyq esik» kúnderi, mamandyqtar jármeńkeleri, forýmdar men kezdesýler arqyly talapkerler men túlekterge naqty jumysqa ornalasý múmkindikterin usynady.
Kolledjdiń irgetasy 1953 jyly qalanǵan. 2020 jyly «Joǵary kolledj» mártebesin alyp, «Jas maman» respýblıkalyq jobasynyń grant ıegeri atandy. Búginde zamanaýı tehnıkalyq bazaǵa, joǵary bilikti pedagogıkalyq quramǵa ıe jáne óńirdiń áleýmettik-ekonomıkalyq damýyna belsendi úles qosyp otyr.