Metallýrgııa, hımııa, jeńil ónerkásip baǵytynda Ulytaýdyń áleýeti zor – Premer-Mınıstr

ASTANA. QazAqparat – QR Úkimeti Ulytaý oblysynyń áleýmettik-ekonomıkalyq damýynyń keshendi josparyn maquldady, dep habarlaıdy QazAqparat tilshisi.

«Metallýrgııa, hımııa, jeńil ónerkásip jáne mashına jasaý salasyn damytý baǵytynda Ulytaýdyń áleýeti óte zor. Qazaqstandaǵy eń iri mys óndiretin kásiporyn Ulytaý jerinde ornalasqan. Óńir turǵyndarynyń úshten biri osy óndiriste jumys isteıdi.

Keshendi jospardy oryndaý jańa oblystyń damýyna aıtarlyqtaı serpin beredi jáne óńir halqynyń ál-aýqatyn arttyrýǵa jaǵdaı jasaıdy», - dedi QR Premer-Mınıstri Álıhan Smaıylov Úkimettiń búgingi otyrysynda.

Sonymen qatar, turǵyn úı jáne kólik ınfraqurylymyn, áleýmettik salany damytý boıynsha jobalar iske asyrylyp, ekologııalyq problemalar sheshiledi. Metallýrgııa ónerkásibi men aýyl sharýashylyǵyn qarqyndy damytýǵa erekshe nazar aýdarylady.

Jeke ınvestıtsııalar esebinen ortasha qýatty munaı óńdeý zaýyty, bıoelektr stantsııasy men hımııa zaýyty salynady. Energetıka salasynda №2 Jezqazǵan jylý elektr stantsııasyn salý jáne Sátbaev qalasynda №1 jylý stantsııasyn jańǵyrtý kózdelgen.

Kásipkerlikti damytý úshin Jezqazǵanda kóterme-taratý ortalyǵy, 3 qonaq úı kesheni, demalys úıi salynady. Sonymen qatar, jergilikti bıýdjet qarajatynan «Tabysqa jetý joly» atty óńirlik bıznesti qoldaý baǵdarlamalary ázirlenedi.

«Eń bastysy 2026 jylǵa deıin 9,5 myńǵa jýyq jańa jumys orny qurylady. Kórip otyrǵanymyzdaı, Keshendi josparda birqatar óte mańyzdy is-sharalar qamtylǵan.

Biz bul qujatty maquldaımyz. Ulttyq ekonomıka mınıstrligi men Ulytaý oblysynyń ákimdigi múddeli memlekettik organdarmen birlesip, jospardaǵy barlyq is-sharalardyń ýaqytyly oryndalýyn qamtamasyz etsin», - dedi Álıhan Smaıylov.