Metall izdegishterdi lıtsenzııasyz paıdalanýǵa tyıym salynýy múmkin

ASTANA. KAZINFORM — Qundy zattar shetelge ketip, «qara naryqta» satylyp jatyr. Bul týraly Májilistiń jalpy otyrysynda tarıhı-mádenı mura obektilerin qorǵaý máselelerine arnalǵan zań jobasyn tanystyrǵan depýtat Ashat Aımaǵambetov aıtty.

- Biz tek eskertkishterdi emes, sonymen birge tarıhı qundylyǵy joǵary jádigerlerdi de joǵaltyp jatyrmyz. Qundy zattar shetelge ketip, «qara naryqta» satylyp jatyr. Kóp jaǵdaıda olardy metall izdegishter men arnaıy qurylǵylar arqyly taýyp alady. Sondyqtan zań jobasynda metall izdegishter men osyndaı qurylǵylardy lıtsenzııasyz paıdalanýǵa tikeleı tyıym salý usynylǵan. Bul — tarıhı muramyzdy tonaýdan, qorǵaýǵa baǵyttalǵan naqty qadam dep oılaımyz, - dedi Ashat Aımaǵambetov.

Osy oraıda ol áli de talqylaýdy qajet etetin birneshe máseleni atady.

- Birinshi másele - jer kadastryna eskertkishterdiń qorǵaý aımaqtaryn engizý. Bul ne úshin kerek? Qurylysty bastaǵanǵa deıin azamattar osy bazadan tarıhı-mádenı eskertkishterdiń bar ekenin bilýi tıis. Qazir ondaı aqparat joq. Sondyqtan osyndaı jerlerge qurylys salý qaýipi bar. Bul túzetý boıynsha Úkimettiń qoldaýy qajet, - dedi ol.

Májilis depýtaty ekinshi másele retinde Memleket basshysy osy salada jaýapkershilikti qatańdatý týraly naqty tapsyrma bergenin, osyǵan oraı zań jobasynda arnaıy normalar usynylǵanymen Úkimet qoldamaǵanyn aıtty.

- Ekinshi oqylymǵa deıin bul másele qaıta qaralyp, Prezıdenttiń tapsyrmasy oryndalýy qajet. Taǵy bir másele – jergilikti tarıhı-mádenı murany qorǵaý ınspektsııalarynyń jumysy. Búginde olar qaǵaz júzinde bar. Alaıda eshqandaı quzyreti, baqylaý tetigi men resýrsy joq. Osy júıeni rettemeıinshe, naqty baqylaý ornatý qıyn, - dedi depýtat.

Aıta keteıik, Májilis zańsyz arheologııalyq qazba jumystaryn tyıatyn zań jobasyn talqylap jatyr.