Metall qabyldaý: Árbir keli úshin zeınetaqy jarnasy tólenedi

ASTANA. QazAqparat - Qazaqstanda «kóleńkede otyrǵan» jumysshylardy, ıaǵnı ózin-ózi jumyspen qamtyp júrgen azamattardy rásimdeýdiń jańa ádisi qolǵa alyndy. Pılottyq joba aıasynda metall qabyldaý beketteri temir-tersek úshin bergen aqshadan zeınetaqy jarnalaryn tóleıdi, dep habarlaıdy QazAqparat tilshisi.

QR Eńbek jáne halyqty áleýmettik qorǵaý vıtse-mınıstri Svetlana Jaqypovanyń aıtýynsha, qazirgi kezde metall tapsyrǵany úshin eshqandaı aqy alynbaıdy. Kez kelgen adam temir-tersekti jınap, qabyldaý beketine tapsyra alady. Alaıda ol aqsha úshin eshqandaı áleýmettik tólemder jasalmaıdy. Búginde dál solaı jaldamaly jumysshylar da jalaqy alyp júr. Endigi kezekte metall qabyldaý beketteri temirdiń árbir kelisi úshin bergen aqshanyń áleýmettik salyǵyn, sondaı-aq zeınetaqy jarnasyn aýdarýǵa mindetteledi. Pılottyq joba sátti iske assa, ony keńinen taratý josparlanǵan. «Salyq kodeksinde arnaıy norma qarastyrylǵan. Bul bizdiń ózin-ózi jumyspen qamtyp júrgen azamattardy rásimdeýdiń alǵashqy qadamymyz deýge bolady. Negizi, zeınetaqy zańnamasyna sáıkes azamattyq-quqyqtyq kelisimsharttar boıynsha jumys isteıtinder zeınetaqy jarnalaryn aýdara alady. Metall qabyldaý beketteri sol azamattyq-quqyqtyq kelisimshart boıynsha isteıtinderdiń qataryna qosylyp otyr», - dedi S.Jaqypova búgin Astanada ótken baspasóz máslıhatynda.

Al QR Eńbek jáne halyqty áleýmettik qorǵaý vıtse-mınıstri Nurjan Áltaevtyń sózine qaraǵanda, qazirgi kezde ózin-ózi qamtyp júrgen azamattardy rásimdeýge arnalǵan zań jobasy pysyqtalyp jatyr. «Jyldyń aıaǵyna deıin biz Parlament Májilisine arnaıy zań jobasyn engizýdi josparlap otyrmyz. Onda «kóleńkede júrgen» kásipkerlerdi resmı túrde tirkelýge yntalandyrý tetikteri bolady. Máselen, salyqtyq jeńildikter, aıyppuldan bosatý jáne taǵysyn taǵy. Osy kásipkerler kóleńkeden shyqsa, jaldamaly jumysshylarmen kelisimshart ta jasalady, áleýmettik tólemder de aýdarylady», - dep atap kórsetti N.Áltaev.