Metaldardy qaıta óńdeý Qazaqstan ekonomıkasy ósiminiń negizine aınalady — sarapshylar
ASTANA. KAZINFORM — Paıdaly qazbalardy shıkizat kúıinde satýdan góri, olardy óńdeý modeline kóshý MINEX Kazakhstan forýmynda talqylanǵan negizgi taqyryptardyń biri boldy. Jıynda sarapshylar ekonomıkaǵa qurylymdyq ózgerister qajet ekeni jóninde pikir bildirdi.
Ásirese, mys, polımetall jáne sırek metaldardy óńdeýdi damytý basym baǵyt retinde qarastyrylady. Degenmen, negizgi maqsat — jekelegen jobalardy júzege asyrý emes, salada aýqymdy ózgeris jasaý.
— Metall óńdeýdi jolǵa qoısaq, ekonomıkanyń qurylymy túgeldeı transformatsııalanady. Jańa óndirister ashylady, jetkizý tizbekteri qalyptasady, jumys oryndary qurylady, tehnologııalyq deńgeı ósedi, — dedi Advantix kompanııasynyń basqarýshy dırektory jáne MINEX Forum-nyń tóraǵasy Artýr Polıakov.
Sonymen qatar, onyń sózinshe, negizgi másele — ınvestıtsııa jáne tehnologııalardy tartý.
— Zaýyttar salýmen ǵana is bitpeıdi. Investorǵa da jaǵdaı jasaý kerek. Oǵan óndiris ornynyń qalaı jumys isteıtini, qarjy salymdarynyń qalaı qorǵalatyny, jobanyń ekonomıkasy qandaı bolatyny túsinikti bolýy kerek. Bul — zańnamadan bastap tehnologııalarǵa deıin qamtylýy tıis keshendi mindet, — dedi Polıakov.
Demek, qaıta óńdeý máselesi — tek salalyq jumys emes, Qazaqstan ekonomıkasy úshin strategııalyq mindet. Óıtkeni, bul sektor eldiń uzaq merzimdi turaqtylyǵy men básekege qabilettiligine áser etedi.
Aıta keteıik, buǵan deıin Qazaqstanda qaıta óńdeýge jaramdy 56 mlrd tonna metallýrgııa qaldyǵy bar ekeni jóninde jazǵanbyz.
