Metal baǵasynyń túsýi bıýdjet kirisin kemitti – Qarjy mınıstri
ASTANA. KAZINFORM – Qarjy mınıstri Mádı Tákıev Úkimet otyrysynda qańtar-aqpan aılarynda respýblıkalyq bıýdjettiń kiris jospary tolyq oryndalmaı qalǵanyn málim etti.
«Respýblıkalyq bıýdjetke 1 trln 902 mlrd teńge kiris tústi nemese jospar 83%-ǵa oryndaldy. Kiris jospary 396 mlrd teńgege oryndalmady. Bul ımportqa qosylǵan qun salyǵy, korporatıvtik tabys salyǵy jáne shıki munaıǵa eksporttyq keden bajy. Basty sebepterdiń biri - negizgi eksporttyq taýarlarǵa álemdik baǵanyń tómendeý úrdisi. Máselen, aǵymdaǵy jylǵy qańtar-aqpanda metaldardyń baǵasy orta eseppen 9,1% tómendegen. Sondaı-aq, «Teńizshevroıl» jaýapkershiligi shekteýli seriktestiginiń munaıdyń eksport kólemin 2022 jylǵy jeltoqsannan 2023 jylǵy qańtarǵa aýystyrýyna baılanysty eksporttyq keden bajynyń salyǵy salynatyn shıki munaı eksporty kóleminiń 1 mln tonnaǵa azaıǵany baıqalady», - dedi mınıstr.
Sondaı-aq, ol jospardyń oryndalmaýyna 2023 jylǵy qosylǵan qun salyǵynyń 594 mlrd teńgeniń 252 mlrd teńgesi áli bıýdjetke túspegeni áser etkenin eske saldy.
