Metadondyq terapııa tıimsizdigin kórsetti - depýtat
ASTANA. QazAqparat - QR Parlamenti Májilisiniń jalpy otyrysynda depýtat Merýert Qazbekova esirtkige táýeldilikten emdeý úshin «metadon» paıdalanýǵa qarsy ekenin málimdedi, habarlaıdy QazAqparat.
«Aq jol» fraktsııasy buǵan deıin birneshe márte Qazaqstanda «metadon» sıntetıkalyq esirtkisine tyıym salý máselesin kótergenin eske salyp ótken depýtat, elimizge «metadon» pılottyq joba aıasynda esirtkige táýeldilikten emdeý úshin tasymaldanatynyn sóz etti.
Onyń sózine qaraǵanda, 2008 jyldan beri júrgizilip kele jatqan «metadondyq» terapııany engizý boıynsha Densaýlyq saqtaý mınıstrliginiń pılottyq jobasynyń qaýip-qaterli saldary týraly belgiler baıqalýda.
Táýelsiz sarapshylardyń málimetinshe, metadondyq baǵdarlamaǵa qatysýshylar arasynda ólim-jitimniń joǵary deńgeıi baıqalǵan.
Densaýlyq saqtaý mınıstrligi derekterinde atalǵan jobany júzege asyrý kezeńinde baǵdarlamaǵa qatysýshy 1 141 adamnyń túrli sebeptermen 875-i, ıaǵnı 77 paıyzy shyǵyp ketkendigi atap ótilgen.
«Bul óz kezeginde baǵdarlama tıimdiliginiń tómen deńgeıde ekenin rastap otyr», - dedi M. Qazbekova.
Belgili bolǵandaı, «metadon» Reseıde tyıym salynǵan, Ózbekstan ilki jobany toqtatyp, qalǵan dárini gýmanıtarlyq kómek retinde bizdiń elimizge berdi. Qyrǵyzstan depýtattary atalǵan esirtkini shyǵaratyn zaýyt qurylysyna qoldaý bildirgen joq.
